(Xarles Videgain, Andres Urrutia, Jean-Baptiste Coyos, Aurelia Arkotxa eta Erramun Osa, gaur, Senperen)
Senpereko aintziran ospatu den Herri Urratsen egin ditu adierazpen hauek euskaltzainburuak. Hona hemen testu osoa:
"Euskaltzaindiaren izenean ekartzen dizkizuet gure goresmenak eta eskerrak, urtero HERRI URRATS honetan euskaldunak bildu eta sustatzearren, ikastolen inguruan.
Aspalditik ari da lanean Euskaltzaindia euskararen eremuan. Horretxegatik, hain zuzen ere, gogoberriturik agertu nahi du bere burua zuen aurrean, euskara eta euskal kulturarentzako aldi esanguratsu honetan.
Egun, badira gure artean euskaraz dihardutenak euren zereginetan. Horra ikastolak, horra Seaska. Egun, euskarak baditu Euskal Herriko lurralde batzuetan egoera aldekoagoa eta eragingarriagoa. Mentsak ditu, ordea, hainbat esparru eta lekutan. Begi-bistakoak dira horiek eta bete beharrekoak. Horretan dihardu Euskaltzaindiak, euskalgintzaren beste eragileekin batera, euskararen kalitatea, estatusa eta euskaraz moldaturiko kultura sustatzeko ahaleginetan.
Ohorerako baino, zerbitzurako gogoa du Euskaltzaindiak. Hartara, datorren urtean berriro ere HERRI URRATS-en bilduko garelarik, ehun urte betetzeko puntu-puntuan izango da Akademia, eta, duela ehun urte bezalaxe, hementxe izango duzue euskararen Akademia, prest eta adi, euskara eta euskal kultura aldezteko eta aitzinatzeko.
Gaur, Baionako Bernat Etxepare Lizeoa dugu laguntza hartzaile eta '(h)aizu' lemapean biltzen gara. Haizu ez ezik, lege osokoa izan dadila Euskal Herrian euskararen erabilera eta presentzia! Atxiki dezagun eskuara!"
Pasa den 2017ko urtarrilean, Euskararen I. Plan Estrategikoa onartu ondotik eta haren garapena abian jartzearren, Nafarroako Gobernuak Foru Dekretu baten proposamena prestatu du, Euskararen erabilera arautzen duena Nafarroako administrazio publikoetan, beren erakunde publikoetan eta menpeko dituzten zuzenbide publikoko entitateetan.
Kontuan izan behar da 1986ko Euskararen Legearen ondotik, gai honen inguruko bi dekretu izan direla aipagarrienak, Foru Komunitatean euskararen erabileran eragin zuzena izan dutenak. Bata, 1994koa, Juan Cruz Alli presidentearen garaian onartutakoa, Bertzea, 2003koa, Miguel Sanzen agintaldian onartutakoa. Lehenbiziko hark, zuhurki bazen ere, euskararen erabilerarako ireki zituen bideak murriztea izan zuen helburu bigarrenak, eta azken hau da gaur den egun arte indarrean dagoena.
Jabier Kaltzakorta literatura irakaslea eta euskaltzaina elkarrizketatu du Juanra Madariaga kazetariak, maiatzeko 'Bilbao' hilekarian.
Kopla zaharrei buruz hitz egin du bertan ikertzaile markinarrak. "Kopla genero laburra da, baina bizia, ironikoa, esan-indar handikoa. Gure asabetako askok, nik uste, elkar ezagutuko zuten kopla horiek dantzatuz", esan du 'Bilbao'n Kaltzakortak.
Gai honen inguruan, eta besteak beste, Dantza-kopla zaharrak (Labayru, 2007) eta Gernikako kopladia, Julio Bareñoren kopla-bilduma (Euskararen Iker Atalak, 2014) lanak argitaratu ditu Kaltzakortak.
<hr id="sys
Andres Urrutia euskaltzainburuak berbaldi txiki bat eskainiko du sarrera-ekitaldian, hamarrak aldera.
Juan Garzia irakaslearen eskutik egingo den ikastaro berri bat antolatu du EIZIEk: 'Nola jokatu euskaraz erdarazko prosa bihurrien aurrean'. Donostian egingo da, Euskaltzaindiaren egoitzan (Luis Villasante Ikergunean/ Tolare baserria-Almortza bidea, 6), maiatzaren 23an, 24an eta 29an, arratsaldeko 16:00etatik 20:00etara. Guztira 12 ordu izango ditu (lau orduko hiru saio).
Mintegi honetan, euskarazko prosaren bide naturaletatik aldentzen diren testuetako egiturak itzultzeko estrategia eta taktika egokiak landu nahi ditu Euskal Itzultzaile, Zuzentzaile eta Interpreteen Elkarteak; horretarako, egunero darabiltzaten itzulgaietatik lagin batzuk hartu, eta haiei ekingo diete; aukerako diren itzulpen-bertsioak konparatu, eta haien egokitasuna ebaluatuko dute.
Izena emateko epea: 2017ko maiatzaren 8tik 15era, biak barne.