32.7.1a Bietara ordena daitezkeen hainbat eta zenbat morfemen arteko korrelazioak maila berdintasuna adierazten du, konparatuak adjektiboak direnean: Bakoitzak du frogaturen haren pazientzia hainbat izan dela luze zenbat pena larria (Etxeberri Ziburukoa); Zenbat ere erdiragarri izan baitzen Ama eta Seme haien batzea Kalbarioko mendian, hainbat pozgarri izan zen orduan Amaren eta Semearen besarkatzea (Intxauspe).
32.7.1b Hainbate(na)z eta zenbate(na)z morfema korrelatuak ere erabiltzen dira mota honetako konparazioan286: Ezen zenbatenaz baitu luze pazientzia, hainbatenaz eman ohi dik gaztigu larria (Etxeberri Ziburukoa); Eta zenbatenaz baita handi gure premia, Jainkoaren faborea hainbatez da handia (Etxeberri Ziburukoa); Zenbatez triste bizia, hainbatez eder saria! (J. P. Arbelbide). Zenbatekoa adierazten duten morfemak dira esaldi horietan ageri direnak, baina, adjektiboekin doazenez, hauen maila da seinalatzen dutena.
286 Hainbatenaz formari buruz, OEH s. v. hainbat: “Exclusivo de la tradición septentrional, prácticamente desaparece en el s. XX”.