32.1.2.2a Konparazioaren termino esaldiko perpausen subjektuak, objektuak, konplementu adberbialak eta are aditzak berak edota predikatuak izan daitezke. Ondoko adibideetan azpimarra jarraitua dutenak dira konparazioaren lehen terminoa eta puntuzko azpimarra dutenak bigarrena, erreferentziazkoa:
Zurea bezain handia da nire etxea
Zuek baino opor luzeagoak egin ditugu aurten (guk)
Janaria adina zaindu behar dugu edaria
Lehenari adinako saria eman diote bigarrenari
Zuekin baino opor luzeagoak egin ditugu aurten haurrekin
Iaz baino opor luzeagoak egin ditugu haurrekin aurten
…
Marrazki horrekin, gela apaindu baino gehiago zikindu egin duzue
Liburu hori lodia bezain aspergarria da
Erabilgarria bezain garestia da telefonoa
Mutiko baino neska gehiago sortzen da
32.1.2.2b Adibideetan ikusten den moduan, konparazioaren bigarren terminoak paralelotasun kontzeptuala eta funtzionala du lehen terminoarekin (nire etxea — zurea; guk — zuek; edaria — janaria; bigarrenari — lehenari; haurrekin — zuekin; aurten — iaz; zikindu — apaindu; aspergarria — lodia; garestia — erabilgarria; neska — mutiko). Kategoriari dagokionez ere maiz paraleloak dira termino biak, baina ez beti (Lehengo lagunekin baino zuzenago dabil orain).
Terminoak osagai bat baino gehiago dituztenak ere izan daitezke (Zuek kalean baino lasaiago bizi naiz ni mendian; Nik bihotzean atsegin dudan adina ur ez dauka itsasoak).