Hizkuntza-zuzenbidea. Testu-bilduma euskaraz

3.1. Lanaren Nazioarteko Konferentziaren Erregelamendua, 1919ko azaroaren 21ekoa[60]

2. artikulua.— Bilkuretako parte-hartzaileak

2. Eskuordeez eta haien kontseilari teknikoez gain, hauek izango dira Konferentziako parte-hartzaileak:

g) eskuordetzen idazkariak eta interpreteak;

6. artikulua.— Idazkaritza

2. Konferentziaren Idazkaritzak (aurrerantzean, «Idazkaritza») eginkizun hauek izango ditu:

a) dokumentuak, txostenak eta ebazpenak jasotzea, itzultzea, argitaratzea eta eskuragarri jartzea;

b) bilkuretan esandako diskurtsoak interpretatzea;

9. artikulua.— Idazketa Batzordea

1. Konferentziak idazketa batzorde bat eratuko du, zeinak berrikusiko baitu erregelamendu honen arabera edo Konferentziaren erabaki berezi baten ondorioz igortzen zaizkion tresna guztien idazkera; gainera, batzorde horrek tresna horien testuak Konferentziaren hizkuntza ofizialetan bat datozela bermatuko du. Idazketa Batzordeak iritzia emango du, era berean, Konferentziak edo batzorde batek horrelako tresna oro aztertzean planteatzen dizkion idazketa-gaiei buruz.

2. Tresna bakoitzeko, Idazketa Batzordea osatuko dutenak hauek izango dira: a) gehienez ere, hiru gobernu-eskuorde edo kontseilari tekniko; b) gehienez ere enplegatzaileen hiru eskuorde edo kontseilari tekniko; c) gehienez ere langileen hiru eskuorde edo kontseilari tekniko —horiek izendatuko ditu aztertu beharreko testua edo idazkera-arazoa aurkezten duen batzordeak, edo Konferentziak, baldin eta testua batzorde batean eztabaidatzen ez bada—.; d) batzordeko txostengilea, eta e) Konferentziako kontseilari juridikoa. Idazketa Batzordeko kideek, ahal den neurrian, Konferentziaren hizkuntza ofizialak jakin beharko dituzte, eta Idazkaritzako funtzionarioen laguntza izango dute.

3. Erregelamendu honen 4. zatiko xedapenak ez zaizkio aplikatuko Idazketa Batzordeari.

18. artikulua.— Ebazpenak

1. Ebazpenak idatziz aurkeztu beharko zaizkio Idazkaritzari, Konferentziaren hizkuntza ofizialetako batean, eta Idazkaritzak gainerako hizkuntza ofizialetara itzuli beharko ditu, eta egileek aurkeztu eta aztertu baino lehen banatu.

29. artikulua.— Hizkuntzak

1. Konferentziaren hizkuntza ofizialak espainiera, frantsesa eta ingelesa izango dira.

2. Konferentziaren dokumentu guztiak hiru hizkuntza ofizialetan jarriko dira eskuragarri.

3. Idazkaritzak interpretazio-zerbitzuak emango ditu hiru hizkuntza ofizialetan eta, Administrazio Kontseiluak besterik erabaki ezean, baita Konferentziaren lan-hizkuntzetan ere (alemana, arabiera, txinera eta errusiera). Eskuordeek beste edozein hizkuntzatan hitz egin ahal izango dute, baldin eta haien eskuordetzak interpretazio-zerbitzuekin lotutako gastuak ordaintzen baditu, hizkuntza horretatik eta hizkuntza horretara zuzendutakoak, edo Idazkaritzarekin berariaz hitzartutako modalitateen arabera.

41. artikulua.— Mozioak, ebazpenak, zuzenketak eta ordena-arazoak

2. Egileek zuzenketak aurkeztu aurretik, zuzenketok idatziz aurkeztu beharko zaizkio Idazkaritzari, Konferentziaren hizkuntza ofizialetako batean, batzordeak ezarritako epeen barruan, eta Idazkaritzak beste hizkuntza ofizialetara itzuli eta banatu beharko ditu. Hala ere, artikulu honetan aipatutako baldintzetan jada gordailututako zuzenketen aldaketak (azpizuzenketak) eta ebazpenei egindako zuzenketak aldez aurretik abisatu gabe aurkeztu ahal izango dira, batzordeak besterik erabaki ezean.

45. artikulua.— Eztabaida sinpleko prozedura prestatzeko etapak

2. Erantzunek ahalik eta lasterren heldu beharko dute Bulegora, eta, edozelan ere, gutxienez hamaika hilabete lehenago, gaia eztabaidatu behar den Konferentziaren bilera hasi baino lehen. Estatu federalen edo galdetegiak hizkuntza nazionalera edo nazionaletara itzuli behar diren herrialdeen kasuan, erantzunak prestatzeko aurreikusitako zazpi hilabeteko epea zortzi hilabetera luzatuko da, gobernu interesdunak hala eskatzen badu.

46. artikulua.— Eztabaida bikoitzeko prozedura prestatzeko etapak

2. Erantzunek ahalik eta lasterren heldu beharko dute Bulegora, eta, edozelan ere, gutxienez hamaika hilabete lehenago, gaia lehenengoz eztabaidatu behar den Konferentziaren bilera hasi baino lehen. Estatu federalen edo galdetegiak hizkuntza nazionalera edo nazionaletara itzuli behar diren herrialdeen kasuan, erantzunak prestatzeko aurreikusitako zazpi hilabeteko epea zortzi hilabetera luzatuko da, gobernu interesdunak hala eskatzen badu.

50. artikulua.— Itzulpen ofizialak

Testuak espainieraz, frantsesez eta ingelesez onartu ondoren, zuzendari nagusiak hitzarmenen eta gomendioen itzulpen ofizialak aurkeztu ahal izango ditu, gobernu interesdunek hala eskatuz gero. Gobernu interesdunek itzulpen horiek beren herrialdeetan kautotzat jo ahal izango dituzte, hitzarmenak eta gomendioak aplikatzeko.