Iduri du 85. arauak ez diela tokirik egiten -ren moldekoei euskara estandarrerako. Arauak, hizkera-modu ezberdinez ari denean, aipatu, aipatzen ditu gisa horretako formak ere badirela euskaraz (ikusiren, biziren, galduren), baina etorkizuneko partizipioaren araua zedarritzean, ez ditu aipatzen (nahiz eta ez dituen debekatzen ere). Beraz, ulertzen da ez direla apropos-egokiak ‘batuan’ erabiltzeko, nahiz egokiak diren euskalki mailan.

Euskal Gramatika. Lehen Urratsak II liburukian (6.2.2. Geroa, 116. or.) eta Euskararen Gramatika Laburra gramatikan ere (256. or.) aipatzen dira; gramatika horiek, ordea, deskriptiboak dira eta, beraz, euskararen barneko hizkuntza-fenomeno guztietara daude irekiak, baina ez dira arauemaileak. Araua ―85. araua, kasu honetan― gramatika deskribatzaileen gainetik dago.