Junes Casenave abade zuberotarra, batez ere, pastoralak idazteagaitik nabarmendu zen, baina bestelako argitalpenak ere ondu zituen. 2000tik ohorezko euskaltzaina zen, eta 2018ko irailean hil zen. Jean-Louis Davant euskaltzain emerituak gogoratu du haren izaera "gozoa eta alaia". "Ipuin kontalari bikaina ere bazen Junes, irakasle atipikoa, irekia, gai guztiei zabalik zegoena", esan du Davantek. Casenavek pastoralgintzan eginiko lana goraipatu du Davantek, "maila gorago batera eraman baitzuen generoa".
Manex Pagola kantagintzan nabarmendu zen batez ere: hasieran abesten, eta ondoren letragile moduan. Berak idatzitako abesti asko ezagun-ezagunak dira euskal errepertorioan. Bestetik, Ipar Euskal Herrian herrigintzako eta kulturgintzako alor ugaritan eragile sutsua izan zen. Ohorezko euskaltzain izendatu zuen Akademiak iaz, eta handik gutxira hil zen, 2018ko ekainean. Gexan Alfaro euskaltzain urgazleak aletu du Pagolaren profila: "Beti bide berrietatik abiatzeko prest zegoen, berritzailea izan zen; gogo eta bihotz handiko gizona". "Letragile bikaina bai, baina kantaldi ikusgarriak ere antolatu zituen Manexek", gaineratu du Alfarok.
Xalbador Garmendia zaldibiarra 1965etik zen euskaltzain urgazle, eta euskara batuaren sorreran parte hartu zuen. Itzulpengintzan ibilitakoa, euskara arduradun izan zen Egin-en eta Ikastolen Elkartean. Antzerkigintzan ere aritu zen, Historia triste bat pieza gogoangarria idatzi zuela. Lourdes Otaegi euskaltzain urgazleak ondo ezagutu zuen Zaldibiako maisua. Bere esanetan, "energia handiko gizona" izan zen Xalbador, "adiskidetsua eta umore onekoa". "Orduko gure Google zen Xalbador, bizia, bizkorra eta jakintsua", azpimarratu du Otaegik.