Datorren astean, hilaren 23an, Bilboko Arte Ederren Museoan, 11:45ean, omenaldi xume bat egingo zaie ikastola sortu zutenei, edo euren oinordekoei.
Ondoren, 12:40ean, plaka bat bistaratuko da Bilboko Elkano kalean -han kokatu zen ikastola 1966. urtean-. Julita Berrojalbiz zenaren alabak bistaratuko du oroimenezko plaka. Berrojalbiz Lauro Ikastolaren sortzaile eta lehen zuzendari pedagogikoa izan zen.
Lauro ikastolako eta Euskaltzaindiko ordezkariez gain, Lorea Bilbao Bizkaiko Euskara eta Kultura foru diputatua, Juan Mari Aburto Bilboko alkatea eta Arantza Aurrekoetxea Eusko Jaurlaritzako Hezkuntza sailburuordea bertan izango dira.
Julita Berrojalbiz ohorezko euskaltzaina zen. Hil ondoren, Xabier Gereño ohorezko euskaltzainak bere omenezko hilberri txostena idatzi zuen. Euskera agerkarian argitaratu zen eta hemen irakur daiteke. (PDF, 127,6 KB)
Bestalde, orain dela hamar urte ere, Euskaltzaindiak eta Ikastolak batera ospatu zuten 40. urteurrena eta Akademiaren egoitzan egin zuten Ageriko bilkura. Orduko informazioa Euskera agerkarian argitaratu zen. Irakurtzeko sakatu hemen. (PDF, 174,3 KB)
Historia
Mende erdia igaro da. Lauro ikastolaren webgunean gogorazten denez, Bizkaiko ikastolen mugimendua 1957. urtean hasi zen Bilbon, "San Nikolas elizako ikasgela batzuetan Xabier Peña eta Julita Berrojalbizen bultzadaz, hamalau ikaslerekin eta Mª Angeles Garai andereñoarekin".
San Nikolasetik Iralabarriko frantziskotarren egoitzara joan ziren gero umeak eta irakasleak eta, Gobernadore Zibilaren aginduz, hau ere utzi behar izan zuten. 1960. urtean etxe batean hasi ziren eskola ematen, gero beste batean... 1966. urtera arte: "Etxerik-etxeko epearen amaiera, legeak halabeharrez ekarri zuen: 1965.ean Hezkuntza Legea aldatu zen eta ikasleek Eskolaritate Kartila behar zuten Batxilergora igaro ahal izateko. Orduan erabaki zuten Julita Berrojalbizek eta bere taldeak ofizialtasunerantza jo behar zutela".
Ikastolaren webgunean azaltzen denez, "Tere Rotaetxek, mugimendu honen beste zutoinak, bere Elkano kaleko etxe bat alokatu zien eta bertan kokatu zen Resurrección Mª de Azkue Ikastola 1966. urtean. Hurrengo pausoa, instituzioen babesa lortzea zen eskola legeztatzeko".
Baina ikastetxea legeztatzeko ezinbestekoa zen lege barruko entitate baten arauzko titulartasun eta babesa. Eta Julita Berrojalbizek Euskaltzaindiko idazkaria zen Alfontso Irigoiengana jo zuen, babes eske. Ikastolari babesa ematearen aldeko proposamena 1966ko urtarrilaren 28an onartu zuen Euskaltzaindiak. Gero, Irigoienek Bizkaiko Foru Aldundiari ikastolaren aldeko agiria eskatu zion. Hori lortuta, maiatzaren 25ean idatzi zion Madrileko Hezkuntza Ministerioko Lehen Hezkuntza Zuzendari Nagusiari ikastola legeztatzeko arauzko eskabidea: ´´...en el cual se enseñará, además del idioma oficial, en lengua vasca...´´.
Behin-behineko baimena lortu ondoren, ikastola lanean hasi zen. Legezko baimena, berriz, ez zen heltzen. Azkenean, Julita Berrojalbiz, Tere Rotaetxe eta Alfontso Irigoien Madrilera joan ziren. Apirilaren 17an, Lehen Hezkuntzako zuzendariak hartu zituen. Honek, behin eta berriro esan zien ez zela posible legeztatzea eta esperantzarik gabe itzuli ziren Euskal Herrira. Bost egun barru, baina, legeztatzearen berri ematen zuen telegrama heldu zen. Erabakia 1968ko maiatzaren 7an argitaratu zen Espainiako Aldizkari Ofizialean.