Sarituak azaldu bezala, euskalgintzan zeukan interesak bultzaturik hasi zen lanean: "Hasiera batean euskalgintzan interesaturik nengoen, horrek bultzatu ninduen ondoren kulturgileek gaur egungo gizarteetan eta, bereziki, mugimendu sozialetan dauzkaten eginkizunak ulertzen saiatzera. Lan enpirikoan, berriz, euskalgintzan intelektualek hizkuntzari buruz sortu dituzten diskurtsoak eta irudikapenak aztertu nituen".
Izan ere, hori da hau bezalako lan batek egin ohi duen bidea, Soziologiaren eta, oro har, Gizarte-Zientzen esparruan: "Hurbileko errealitate sozialei buruzko interesak eragiten du sarritan gai baten hautaketa. Baina, hasierako interes partikular horretatik jauzi egin behar da gero gogoeta teorikora, eta handik berriro azterketa enpirikora. Tesi honen bidea horixe bera izan zen".
Hortaz, Larrinagaren tesiaren gogoeta teorikoa hauxe da: "Tesiaren atal teorikoa, intelektual moderno ilustratuaren gainbehera soziala baieztatzen duten diagnostikoen azterketatik abiatzen da. Diagnostiko horien arabera, bizi dugun Beranduko Modernitate honetan intelektual ilustratuek Aro Modernoan zeukaten estatus pribilegiatua zeharo ahuldu duten aldaketak agertu dira".
"Halaz ere, intelektualak euren rolak eta identitateak berriz eraikitzeko gai izan dira bestelako agertoki instituzionaletan, gure ustez, garaian garaiko tradizio intelektualak osatzen baitira esparru kulturalean. Tradizio horietako bat kulturgileek mugimendu sozialean baitan egin dezaketen lan intelektualaren bidez eraiki da".
Hari horri jarraituz osatu du bere ikerketa, eta atal enpirikora pasatu. Ondorioz, "mugimendu sozial jakin batean egindako lan kognitiboa hartu da aztergai. Hain zuzen ere, euskalgintza aztertu da esparru kognitibo eta intelektual gisa. Hala, Eusko Pizkundetik aurrera, euskalgintzaren historian euskal kulturgileek euskarari buruz sortu dituzten diskurtsoak eta irudikapenak aztertu dira, eta errepresentazio horiek mugimenduan izan duten eragina".
Bide berriak urratuz
Tesia euskaraz egiteak "erantsitako" zailtasunak ditu, Ane Larrinagaren ustez. Eta ondo azaltzen du: "Alde batetik, "barne" zailtasunak daudela esango nuke. Hiztegi teknikoari dagokionez, adibidez, gure esparru zientifikoetan oraindino erabaki gabeko auziak daude. Zaila egiten zaigu askotan erregistro eta estilo egokiak aurkitzea. Zehatzak eta argiak izatea eta, aldi berean, zorrotzak gure gai konplexu horietan. Bide berriak urratzen ari gara etengabe".
"Beste alde batetik -gaineratzen du- "kanpoko" zailtasunak daude, tesiari berari gehitutakoak nolabait esateko: norberaren diziplinako katedradun euskaldunez osatutako epaimahaiak eratzeko arazoak, tesi zuzendari euskaldunak atzemateko arazoak".
Hirugarrenez, "eta, ororen gainetik, egindako ahaleginak ez dauka gero -edo behintzat ez du izan orain arte- aitortza handirik mundu akademikoan: askoz ere errentagarriagoa izan da tesiak gaztelaniaz edo ingelesez egitea".
Horregatik guztiagatik eskerrak eman nahi ditu -"ohore handia izan da niretzat sari hau jasotzea", dio-. Horrezaz gain, ekimen honen garrantzia azpimarratu nahi du. Izan ere, gauzak aldatuz joan daitezen balio dezake: "Ikertzaileek beraien tesiak euskaraz egin ditzaten eta horrek euren merezimenduetan dagokion isla izan dezan".
Zientzia eta ikerketa euskaraz egitearen aldeko arrazoi ugari ikusten du Ana Larrinagak: "Zenbat eta tesi eta lan zientifiko gehiago argitaratu euskaraz, corpus handiagoa izango dugu erreferente gisa diziplina eta esparru guztietan. Zenbat eta ikertzaile eta akademiko gaitu gehiago sortu Unibertsitatean, hainbat eta aholkulari gehiago izango dute ondoan hemendik aurrera euskaraz ikertu eta argitaratu nahi duten gazteek".
"Zenbat eta aitorpen handiagoa egin euskaraz burutzen den ikerketari, hainbat eta ikertzaile gehiago ohartuko da baloratu egiten dela ingelesez eta gaztelaniaz ez ezik, euskaraz ere sortu eta argitaratzen dena. Hitz batean -laburbiltzen du- garrantzizkoa da, ene iritziz, tradizio akademiko bat sortzea euskaraz. Hori da gure erronka, eta horretarako euskara bera eta euskaraz sortzen den ezagutza baloratu eta sustatu egin behar ira mundu akademikoan, beste lorpen eta meritu batzuk saritzen diren bezala".