JAGONET galde-erantzunak

Lekua adieraztea: -tik/-dik (barrenetik/barrendik; hurbiletik/hurbildik)

NONDIK kasua deklinatzean, nola jokatu behar da hitz arruntekin, bukaeran -n edo -l duten hitzetan? Eta hauekin?

barrendik/barrenetik

hurbildik/hurbiletik

urrundik /urrunetik

ehundik gora / ehunetik gora

  1. Izen arruntek beti -tik hartzen dute, -e- epentetikoaren premia zainduz: haranetik, irailetik
  2. Izen berezietan, bi sail bereizi behar dira:

1- Leku-izenak. Halakoetan, -tik/-dik aukerakoak dira: Irundik/Irunetik, Usurbildik/Usurbiletik

2- Leku-izenak ez diren baina izen berezien baliokide diren adierazpen izendatzaileak, hala nola enpresa, talde eta erakunde, merkataritza-establezimendu, marka, gertaera, eta era guztietako artelan eta bestelako sorkarien izenak. Halakoetan, -(e)tik da aukera bakarra (183. araua): Euskalteletik, Ederlanetik"izen bereziak: adierazpen izendatzaileen deklinabidea (leku-izen edo pertsona-izen ez diren izen bereziak)" (EBE)

  1. Adberbioetan, bietako erabilerak aurki daitezke: hurbildik/hurbiletik, urrundik/urrunetik

Ehundik/ehunetik bikotearen kasuan, Euskaltzaindiaren Hiztegian ehunetik da sarrera; tradizioan, hala ere, ehundik sarri erabili izan da.

Horrez gainera, ikus hau ere: "Lekua adieraztea: NON, NORA, NONDIK bukaeran n, l, s, z, tz edo r letra duten izenetan (Irun, Madril, Paris, Zarautz, Eibar...)" (JAGONET).

 

Informazio gehigarria:

Zalantza-mota: morfologia > kasu-markak

Unitate-mota: hitzak > adberbioak

  • Euskaltzaindia - Real Academia de la Lengua Vasca - Académie de la Langue Basque
  • Plaza Barria, 15. 48005 BILBO
  • +34 944 158 155
  • info@euskaltzaindia.eus
© 2015 Your Company. All Rights Reserved. Designed By JoomShaper