Euskaltzaindiaren helburuetako bat hizkuntza-eskubideen alde egitea da eta, hortaz, euskararen erabilera sustatzea.
Nafarroari dagokionez, Euskaltzaindiak behin baino gehiagotan eman du aditzera, euskaldunen eskura jarri beharreko baliabideen artean garrantzitsuenetako bat euskaraz ari diren irratiak direla, Iruñerrian bereziki. Izan ere, azken urteetan euskal hiztunak gehituz joan dira eremu honetan, eta gaur hor bizi da Nafarroako euskaldunen kopururik handiena.
Zalantzarik gabe, Iruñerrian irrati batek euskaraz aritzeko administrazio-lizentzia izateak bultzada sendoa emango lioke Foru Komunitatearen barruan euskara zaindu, sustatu eta gizarteratzeari, Nafarroako Euskararen Legeak agindu bezalaxe.
Euskaltzaindiak, Elantxoben, 2006ko maiatzaren 26an,
egindako Osoko bilkuran onartua.
(Euskaltzaindiaren Azkue Biblioteka eta Artxiboa)