Bai, zuzena da. Hala dator jasoa Euskararen Gramatikan (2021) —"36.1. Oinarrian perpausa duten osagarri adberbialak (‘Denborazko perpausak’)" (Euskararen Gramatika)—, eta bertan datorren adibidea galderakoaren parekoa da: Hara joaten nintzenero gauza bera entzuten nuen.

Arrazoia zera da: Aldi izena isilpean duten erlatiboak dira horrelakoak (herriratzen naizen [aldi]etan; joaten nintzen [aldi]ero; esaten duzun [aldi] bakoitzean...). Beraz, Hara joaten nintzenero (= joaten nintzen aldiro) gauza bera entzuten nuen. Eta horien ordainak dira hauek ere: joaten nintzen bakoitzean, joaten nintzen aldikal, joaten nintzenetan...