Ez dirudi -ekiko atzizkiak nahitaez izenlagun izan behar duenik; izan ere, badira galderan aipatutako adibideak bezalakoak (eta ez gutxi) euskararen literatura-tradizioan. Ez dago esaterik, beraz, galderako egitura horiek okerrak direnik.

Egia da Iparraldeko tradizioan -ekilako (alegia, -ekikoren baliokidea) izenlagun gisa erabiltzen dela beti eta ez duela adizlagun erabilerarik. Hegoaldeko tradizioan ere, esan bezala, adizlagun erabileraren lekukotasunak badiren arren, izenlagunarenak askoz ere ugariagoak dira: alegia, gurasoekiko errespetu handia du edo gurasoekiko harremanak hoztu egin dira aspaldion bezalakoak.

Ikus hauek ere: "Lexikoa: maitasuna, gorrotoa, konfiantza (elkarrenganako/elkarrekiko maitasuna/gorrotoa/konfiantza)" (JAGONET), "Ustea/iritzia adieraztea: nirekiko / nire ustez" (JAGONET).

Gehiago sakondu nahi izanez gero, jo "-ekiko atzizkia" (EBE) sarrerako Gehiago jakiteko ataleko bibliografiara.