Lehenengo esaldia da zuzena, bigarrena ez: Jarrai iezaguzu sare sozialetan.

Euskaltzaindiaren Hiztegiaren arabera, [EH:jarraitu] aditza dio erregimenekoa da ―NORI berekin duena, alegia―. Egia da du erregimenekoa ere izan litekeela, baina ez galderan ematen zaion adieran. Aski esanguratsuak dira hiztegian bertan ageri diren adibideak: Etxeraino jarraitu dio. Urrundik jarraituko diot. Jarraitu zion.

Auzi honetan harira dator jarraitu aditzak sinonimoa duen segitu aditza ere. Eta hori erabili nahi izatera, bi moldeak dira egokiak orduan: Hegoaldeko ohituran, Segi(tu) iezaguzu sare sozialetan; Iparraldekoan, Segi gaitzazu sare sozialetan [EH:segitu] (bukaerako oharra).

Jarraitu aditza erabili ordez jarraiki aditza erabili nahi bada, hauxe da ordaina: jarraiki zakizkigu. [EH:jarraiki]. Arrazoia: aditz hori zaio erregimenekoa da.