Honela behar du: Opuseko kidea edo Opus-eko kidea.

‘Adierazpen izendatzaileen deklinabidea’ izeneko arauak jorratzen du gai hori (183. araua), eta bertan, leku-izen edo pertsona-izen ez diren izen bereziak hartzen dira kontuan. Esate baterako: Twitter, Euskaltel, Fagor, Ederlan, Nafarroa Oinez…

Arau horren arabera, kontsonantez bukatuek beti gorde behar dute -e- epentetikoa, eta aukerakoa da marratxoa erabiltzea: Twitterreko/Twitter-eko (*Twitterko), Euskalteleko/Euskaltel-eko (*Euskaltelgo), Fagorretik/Fagor-etik (*Fagortik), Ederlaneko/Ederlan-eko (*Ederlango), Nafarroa Oinezeko/Oinez-eko (*Oinezko)…

Dena dela, izan kontuan arau horrek ez duela zerikusirik leku-izen bereziekin; haietan, -e- epentetikoa ez da nahitaezkoa: Garesko/Gareseko, Eibarko/Eibarreko…