Leku-izenak

(...)
Dok.: Anduezeta (barrio) XVIII. mendean, Andueceta XIX.ean, Anduceta, Andutzeta XX.ean. // Ebakera: Andúzta. // Kokalekua: Antsolokueta du mugakide alde batetik, Tximista errekan. Bertze aldetik, Iñarreta eta Jauregieta, biak, ditu zedarrikide. Hemen ere ubidea da bereiztailea, Jauregietarekikoa Buxungo erreka eta Iñarretarekikoa Artañarangó erreka. Karrikako auzo guztiek erreka dute muga. // Etimologia azalpena: Osagaiak andue ‘lur barnean eta erroei loturik dagoen edozein zuhaitzen enbor zatia' eta -tza, -eta leku-ugaritasunezko atzizkiak dira; osotasunaren adiera ‘andue lekua', ‘andue ugari dagoen lekua' da. Bertze aukera Anduetza oikonimoan oinarriturik dagoela kontu egitea da, eta ‘Anduetza etxea dagoen alderdia' erran nahi duela. //Nabarmentzekoa da, puntu honetan, Etxalargo auzoen izenak bertako etxe baten izenean oinarriturik daudekeela, segur aski etxe horiexek ditugulako auzoen sorreraren oinarrian: Anduetzeta-ren kasuan Anduetzea oikonimoa dago, Iñarretarenean Iñarrea, Jauregieta-renean Jauregia, Gorosurretarenean Gorosurreta, Sarriku-renean Sarriku eta Apezborrorenean Apezborro. Ikusten den bezala, Anduetzeta-n, Iñarreta-n eta Jauregieta-n -eta atzizkia erantsi zaio oikonimoari; Gorosurreta-ren kasuan bai oinarriko etxeak eta bai auzoak -eta dute. Apezborro-n eta Sarriku-n, azkenik, oikonimoa eta auzo izena bera da, eta ez dago atzizkiaren aztarnarik.
(...)