Agurra egitean-eta, Ongi etorri! esan behar da, ez *Ongi etorria! edo *Ongi etorriak! Orobat, Ongi joan! eta Ongi ibili! Adberbioa da horietan ongi, eta ez dagokio mugatzailerik partizipioari. [33. araua]
Arauak, dena den, ez du esaten ongi etorrik, beste partizipiozko perpaus askok bezala, izen bihurtu eta mugatzailea hartu ezin duenik; horregatik, ongietorri (iz.) zuzena da: Ongietorria eman digu (ongietorria izena da hor, ez adberbioa). Ezta ere, beste partizipio asko bezala, izan aditzaren predikatu mugatu bihurtu eta honela esan ezin denik: Zarela ongi etorria! [EH]
EUSKALTZAINDIA. “Esapideak: Ongi etorri! / Zaretela ongi etorriak!”, Jagonet galde-erantzunak.