G/j LETREN IDAZKERA. Mailegu berriak g letrarekin idazten dira oro har: agenda, estrategia, agente, agentzia, geografia, haluzinogeno, ingeniaritza, magia, prestigio... Aspaldikoak dira j dutenak: jende, erlijio, imajina, imajinazio... Hiztegiz finkatzekoak dira asko eta asko, eta, zalantzarik bada, hiztegira jo behar da.

G LETRAREN ALDAKORTASUNA (→ b, d eta g letren aldakortasuna)

AHOSKERA. Euskara zainduan g letrari [g] ahoskera dagokio, hala nola [geologia], [genetika], [pedagogia], [ingeniaritza]... Arau horrek ez dio eragiten, jakina, hizkera zaindugabeari. [87. araua]

KANPOKO HITZEN ETA IZENEN AHOSKERA (→ atzerriko izenen eta hitzen ahoskera)

a) Izen bereziak, oro har, jatorrizko hizkuntzan bezala ahoskatzekoak dira: Google [gugel], Giuseppe Verdi [jiusepe berdi].

b) Toki-izenak:

- Euskaraz ere jatorrizkoan bezala idazten diren leku-izenak jatorrizkoan bezala (ahalik eta gertuen) ahoskatzen dira: Algeciras —[x]; (es) jamón bezala—; Perugia —[y]; euskarazko Jon bezala—; Cambridge [kánbritx]. [158. araua] (→ erdal hitzen deklinabidea; → atzerriko izenen eta hitzen ahoskera)

- Euskaraz berezko grafia duten izenak euskararen arauak betez ahoskatzen dira: Belgika, Egipto... ([g]; ez [x]).

c) Mailegu berriak. Ingelesezko -ing amaieradunak dira sarrienak; bukaerako -g mutu dutela ahoskatzen dira (holding [holdin], ranking [rankin]. (→ -ing (ingelesezko hitz berriak))