Batasunari begira, 1979an hartu zuen Euskaltzaindiak erakusleen inguruko erabakia (Euskera, XXIV, 1979, 629-632. or.). Eranskinetan daude paradigmak (510. or.).

Zehaztapen hauek egitea komeni da paradigma horietaz:

- Desegokiak dira honako forma hauek: *hontan, *hontatik, *hontako..., *hortan, *hortatik, *hortako (> honetan, honetatik, honetako..., horretan, horretatik, horretako...).

- honetaz, horretaz eta hartaz formen baliokideak dira honezaz, horrezaz, harzaz eta honez, horrez, harez formak ere (singularrean zein pluralean). Honetaz, horretaz eta hartaz (eta hauetaz, horietaz eta haietaz) formak dauzka hobetsiak, dena den, Gramatika batzordeak.

- *honetzaz, *horretzaz eta *hartzaz (eta *hauetzaz, *horietzaz eta *haietzaz) baztergarriak dira.

- honez, horrez eta harez (eta hauez, horiez eta haiez) hainbat esapide jakinetan soilik erabili behar dira, ez erakusle soil moduan. Ondo daude, lokailu moduan, honez gain(era) eta horrez gain(era) moduko erabileretarako: Berezko sena zuen jendea ezagutzeko, eta, horrez gain (= horrez gainera), bihotz zabala. Horrez gain(era), leize handi bat dago zuen eta gure artean. Ez da zuzena erakusle modura erabiltzeko: *Etxe horrez mintzatu gara (> Etxe horretaz, etxe horrezaz). *Ez ziren lagun horiez oroitu (> lagun horietaz).

- Horretaz ≠ hortaz. Ez dute balio bera. Horretaz (= horrezaz ere egokia da) erakuslea da. Lehen esan duzun gauza horretaz hitz egin behar dugu. Ezberdina da hortaz ondoriozko lokailuaren balioa: hori dela eta, beraz, horrenbestez eta gisakoen moduko lotura-lana egiten du. Liburu gehienak eleberriak ditu; eleberrigile handi dugu, hortaz? [EH]