Leku-izenak

(...)
Mugazuria, Aristuziaga eta Carasolbajo-ren artean dagoen gailur zapaleko gain soila da hau. Hemendik beheiti Beltranlarratz dugu lehenik, eta Portillo de Chinchón eta Aurino gero. Capaburros toponimo berria da (ez dugu dokumentazioan aurkitu), eta mendiaren izen zaharra kokatu gabe ditugunetako bat izan zitekeen (Mutxorromendi, Mendigorria, Opelamendi...). Rincón de Capaburros Carasolbajo-ko zokoa da, Paso de Ollatu-ren parean dagoena, beste gisaz Rincón de Ollatu deitzen dena.
(...)

(...)
Toponimo hau anitzetan eta anitzetara agertzen da (Ollatio, Oliatio, Oliatu, Oliattu...). Aldaera batutzat agirietan goizdanik azaltzen den eta gaurregungo Ullatu [ullátu]-ren jatorrian dagoen Ollatu aukeratu dugu. Hasierako olia-, olla- horien azpian hortz-hobietako alboko apikaria eta bokal sabaikaria nahiz honen oso antzekoa den sabaiko albokoa egon daiteke (cf. lieco / lleco egungo egunean). Bukaerako -tio horren azpian [tto] bustia egon zitekeen; hemendik bustidura galdutakoan -to [to] aterako zen. Bukaerako erdiko bokala jatorrizkoa izan daiteke, bera baita nagusi toponimo honen lehen agerraldietan, baina Txutxu > Txutxo edo Laku > Lako-n edireten dugun gertakariaren emaitza ere izan liteke, hots, zenbaitek "vocalismo romanizante" deitu izan dutenarena. Hasierako olla- honek toponimo batzuetan agertzen den ollo-, olla- osagaia dakarkigu burutara (cf. Itza zendeako Lete herriko Olladi, Olladialdea edo Ollariko artadia [J. Jurío, TCPCI, 231-232. orr.]). Bukaerako -tio (edo honen azpian egon daitekeen -tto) edo -tu hori zer den ez dakigu (ba al du txikigarriarekin zerikusirik?), baina Uxueko Pipiratu (< Biperatu), Zabartu eta besteren bukaeraz oroitarazten gaitu [Ikus AV, 53. or.]. Ollatu Aliaga ondoan dago, Dorrondiaga eta Carasolbajo-ren artean. 1768ko lekukoak erakusten duenez, Ollatu lehen Aldabea-tzat hartua zen.
(...)