Leku-izenak

(...)
Gaurregun ezezaguna den leku-izen hau Arbolaga nahiz (H)erbolaga da agirietan. Lehenik azaltzen dena eta etimologiarik garbienekoa Arbolaga denez gero, jatorrizko forma hau dela pentsatu beharko dugu, eta Erbolaga (ikus Portal sarrera) bokal disimilazioaren ondorea dela (cf. Astabidea > Esta bidea 1892an, edo Akirazabal > Equiraçabal 1677an). Osagaiak -aga atzizkia aztertzean esan den moldean, arbola 'zuhaitza' eta -aga dira (cf. Zuaizkieta Uxuen bertan). Arbolaga herritik hurbil zegoen, Aldabea de Aitzandieta-ko eguzkialdean, Camino de Lakubeli eta Camino de la Sierra-ren artean edo. Zubia edo Puente de la Sierra-ren ondoan, Barranco de Aitzandieta-ren ertzean zegoen beraz.
(...)

(...)
[-Aga atzizkia gure eskualdean. Uxuen] Arbola 'zuhaitza' eta -aga dira toponimo honen bi osagaiak. Lakuntza aldean egun arboldegie hitza ibiltzen dute hizkuntza batuan zuhaiztia-ren bidez adierazten dena adierazteko. Uxuen bertan Zuaizkieta dugu.
(...)

(...)
Aldabea de la Tejería Aldabea de Larziaga-ren goiko aldea da, eta Balsa de la Tejería Bidemakurra-ko idoia. Carasol de la Tejería Carasol de la Tejería de abajo edo Carasol de Arbolaga da (ikus beherago), eta Cruz de la Tejería eskuarki La Cruz deitu ohi dena. Fuente de la Tejería Bidemakurra-ko idoiaren ondoan dago. Goiko teileria gerla aurretik 1945 inguruan H. Salaberrik berriztatu zuen arte gelditua eta are hondatua egon zen. Berrikuntzaren ondotik urte batez edo biz funtzionatu zuen, eta teilariek, itxi baino lehen, teila pila handiak metatu zituzten, herrian urte batzuetan teila beharrik izan ez zedin. Gerla aurretik, gelditu eta hondatu aitzin, Valencia aldeko teilariak etortzen ziren Uxuera teilak egitera. Buztina Txutxu Alto-tik eta teileriaren ondoko Alto del Guarro-tik hartzen zuten, eta ura Fuente eta Balsa de la Tejería-tik teiletxeraino egindako erretentxo batzuen bidez eramaten zen. Teilak egindakoan teileria ondoko larrainean uzten zituzten lehortzen. Lehen udalarena zen eraikuntza hau partikularra da orain.
(...)