Sobera, gehiegi, sobra eta sobran sinonimoak dira, baina azken biek Euskaltzaindiaren Hiztegian Heg. Herr. markak daramatzatenez (Hegoaldeko eta herri-mailako izatea, alegia), erabilera mugatuagoa dute estandarrean; soberan ez da ageri (beraz, tradizioko esamoldea sobran egon da, eta ez soberan egon).
Sobera ere eta sobra ere (Gip.), berriz, ez dira sinonimoak. Sobera ere = Ongi asko. Sobera ere badakigu ahalegin guztiok alferrekoak gerta daitezkeela. Sobra ere 1 adb. Gip. Itxuraz, nonbait. Harrotuta zebilen sobra ere, eta zirenak eta ez zirenak esan omen zituen. 2 adb. Gip. Noski, jakina. [EH]