Euskaltzaindiaren adierazpenak (1976-2022)

Sagrario Aleman,
Sustapen batzordeko burua

Euskaltzaindiaren zereginetako bat euskara zaintzea eta aitzinatzea da. Xede hori bete ahal izateko, besteren artean, Akademiaren erantzukizuna da Euskal Herriko erakunde publikoei behar diren baliabideen bermea aholkatzea eta eskatzea. Eta hizkuntza erakunde ofiziala den aldetik, hori egin izan du erakunde publikoek bere irizpena eskatu diotenean. Halaber, berme hori kolokan jarri edo ukatu izan den bakoitzean, bere kezka jendaurrean agertu izan du. Euskaltzaindiaren ardura horren lekuko dira urteetan zehar, eta azkeneko lauzpabost hamarkadetan bereziki, plazaratu dituen adierazpenak.

Adierazpen horietako gehienak Akademiaren Euskera agerkarian argitaratu izan ziren eta beste batzuk Azkue Bibliotekako Artxiboan zeuden. Adierazpen horiek erabat sakabanaturik egonik, Sustapen batzordeak argitalpen berezi batean biltzea erabaki zuen. Hala egin zuen 2006. urtean ordura arteko 32 adierazpen biltzen zituen Euskaltzaindiaren adierazpenak izenburuko argitalpenean (Jagon bilduma, 3). Euskaltzaindiak, geroztik ere, zeregin horretan jarraitu nahi izan du. Hartara, Akademiaren mendeurrenaren karietara, Sustapen batzordeak erabaki zuen erakundearen webgunean, edizio digitalean, urtez urte eskaintzea adierazpenen bilduma eguneratua. 2018an gauzatu zen bigarren argitaraldia, eta orduz geroztik beste hiru plazaratu dira. Oraingo hau, 2023ko abenduaren 31n itxi dena, seigarren argitaraldia da eta denera 69 adierazpen ditu.

Sustapen batzordeak bere esker ona agertu nahi dio argitaraldiaren prestatzaileari.