JAGONET galde-erantzunak

Denbora adieraztea: ordubete, astebete, urtebete (*ordubete bat / *hiru astebete / *hiru urtebete)

Ez dakit zuzenak eta egokiak diren honako esaldi hauek:

- Hiru urtebete eman ditu Argentinan.

- Hiru astebete pasatu ditu Argentinan.

- Ordubete bat pasatu du etxeko lanak egiten.

Ez dira egokiak erabilera horiek; izan ere, -betek ez du onartzen zenbatzailerik iraupena adierazten duten denbora-izenetan (hilabete da salbuespena, hartua baitu hil izenaren adiera ere).

[EH:urtebete] hitzean ohar hau dator: 'urtebete bat egon zen gaixorik eta kideko esapideen lekuan, Euskaltzaindiak urtebete egon zen gaixorik eta kidekoak erabiltzea gomendatzen du'. Antzeko oharra dator [EH:astebete] hitzean ere.

Hortaz, egokiena da astebete eta urtebete bezala erabiltzea ordubete ere (Ordubete pasatu du etxeko lanak egiten / *ordubete bat).

Ikus hau ere: "Lexikoa: hil eta hilabete" (JAGONET).

 

Informazio gehigarria:

Zalantza-mota: morfologia > zenbatzaileak, lexikoa > orokorra

Unitate-mota: hitzak > determinatzaileak, hitzak > izenak

  • Euskaltzaindia - Real Academia de la Lengua Vasca - Académie de la Langue Basque
  • Plaza Barria, 15. 48005 BILBO
  • +34 944 158 155
  • +34 944 158 144
  • info@euskaltzaindia.eus
© 2015 Your Company. All Rights Reserved. Designed By JoomShaper