JAGONET galde-erantzunak

Aditzaren jokabidea: izan (lehenbiziko gauza da ikasi/ikastea)

Zein da zuzena ondorengo esaldi honetan?: Egin behar dugun lehendabiziko gauza da ikastea/ikasi.

Biak ontzat ematekoak dira gramatikaren ikuspuntutik. Hala ere, Orotariko Euskal Hiztegiko corpusean -t(z)ea formako adibideak dira erabat nagusi (hain nagusi, bestelakorik ia ez baitago): gure leenbiziko lana folleto txukun bat ateraTZEA izan da (Lizardi), Azkuerentzat lehendabiziko kontua zen beste modu garbiago batean ezin esan ahal izaTEA (Mitxelena); partizipioduna, bakarra: Idazlearen eginkizuna erraz da adierazten, gaitz betetzen: hizkuntzari bere burua menderatuaz, hizkuntza menderaTU (Mitxelena).

Izan kontuan, nolanahi ere, aditz guztiek ez dutela berdin jokatzen. Esate baterako, nahi izan aditzaren erabilerari dagokionez (nik lan egin nahi dut / zuk lan egitea nahi dut nik eta abar), jokamoldea bestelakoa da "Aditzaren jokabidea: nahi/nahiago izan (egin/egitea)" (JAGONET).

Esandakoaz gainera, ikus hauek ere: "Aditzaren jokabidea: hobe izan (hobe da gelditu/gelditzea)" (JAGONET), "Esapideak: hobe izan (hobe dut esatea/esan/*esaten)" (JAGONET), "Aditzaren jokabidea: nahi/nahiago izan (egin/egitea)" (JAGONET), "Aditzaren jokabidea: utzi (sartzen/sartzea utzi didate / ez naute utzi sartzera / *ez naute utzi sartzen/sartzea)" (JAGONET).

 

Informazio gehigarria:

Zalantza-mota: sintaxia > aditza, sintaxia > perpausak

Unitate-mota: hitzak-aditzak > aditz-izena, hitzak-aditzak > adizki ez-jokatuak, hitzak-aditzak > partizipioa, perpausa > osagarriak

  • Euskaltzaindia - Real Academia de la Lengua Vasca - Académie de la Langue Basque
  • Plaza Barria, 15. 48005 BILBO
  • +34 944 158 155
  • info@euskaltzaindia.eus
© 2015 Your Company. All Rights Reserved. Designed By JoomShaper