Euskarazko tradizio idatzian ez da ohikoa galderan aipatzen den euskara hitz egiten du egitura. Askoz ere erabiliagoa da euskaraz mintzatu / berba egin / hitz egin egitura, izenondo bat duelarik inesiboan (euskara ederrean mintzatzen da, euskara goxoan...).

Beste aditz batzuekin maizago gertatzen da kasu absolutiboa erabiltzea: euskara ikasi, jakin, irakatsi eta abar. Adibidez, bretoia ikasten dute frantsesa bezain ongi; frantsesaren ikasterat; euskara bera ikasi zuen; euskara jakitez gainera; euskara ere irakatsi du eta abar.

Hala ere, badira tradizioan euskara hitz egin moldeko adibide bakan batzuk: Ez zauzkigu erdaran lokartu ezpainak, euskara baizik ez du mintzatzen artzainak (Xalbador, Odolaren mintzoa, 111. or.).

Ikus hau ere: "Aditzaren jokabidea: ari izan (batuan ari da / batuaz ari da)" (JAGONET).