Bai, egokia izan daiteke. Perpaus bakunetan ez ezik (Bihar euria egingo omen du), mota askotako mendeko perpausetan ager daiteke omen partikula, ez bakarrik galderakoaren moduko adierazpen-perpaus osagarrietan (esan du… omen duela). Ikus adibideok:

- adierazpen-perpaus osagarrietan: Nahiz eta orakuluek susperraldia gertu omen dela dioten. Ez da urte asko-asko, inguru honetan gertatu omen zela.

- erlatiboetan: Aspaldian gogoan omen daukan xede bat.

- zehar-galderetan: Hara zer galdu ei (omen) duen: errealitatearekiko berezko harremana.

- kausazkoetan: Beste inor baino hobeak direla pentsatzen dutenak beraiek odolgarbiak omen direlako.

- elarik menderagailuarekin emanetan: Ura isuri baitu olioaren gainerat, sekulan ez omen delarik hori egin behar!

Euskaltzaindiaren Hiztegian bertan ere [EH:omen1], bada galderan ageri den -(e)la menderagailuarekin osaturiko adibide bat: Hain bide luzea egiteko berandu omen dela eta.

Galderako adibidea egokia izan daitekeela esan dugu arestian, izan ere, komeni da zehaztea ezen, printzipioz behintzat, esanahi diferentekoak direla bi hauek:

Liernik esan du bihar euria egingo duela.

Liernik esan du bihar euria egingo omen duela.

Lehenbizikoan, Lierni bere baitatik mintzo da (adierazi du bihar euria egingo duela). Bigarrenean, beste norbaiten bidez iritsi zaio Lierniri euria egingo duelako kontua, eta hori adierazten du (esaldia honela parafraseatuko genuke: ‘Liernik’ esan du euria egingo duela entzun duela).