Sagardoaren Eguna da aukera egokia; beraz, horixe da gomendatzekoa.

Sagardo-eguna, bertso-eguna, berdel-eguna, balea-eguna eta gisakoak hitz elkartuak dira (mendekotasunezko elkarketak). Hitz elkartuek balio generikoa izaten dute (ez dute erreferentzia konkretu edo jakinik izaten, alegia): txori-kaiola izen elkartuak, esaterako, kaiola-mota bat adierazten du, ez kaiola jakin bat; bertso-egun izen elkartuak ere egun-mota bat adierazten du (bertsoak izan/izango diren eguna alegia, eta hori berez egunero egin litekeen jarduna da), ez egun jakin bat.

Era horretan ulertuta, egun hitzarekin hitz‑elkarte egokiak osatzen dira, baina esanahi erabat generikoa dutela ulertu behar dira, hala nola eskola-eguna, gogoeta-eguna, elur-eguna, greba-eguna, bertso-eguna eta abar.

Baina ez dira era horretakoak galderan ageri direnak, eta horregatik dira zalantzakoak: ?Sagardo Eguna, ?Bertso Eguna, ?Berdel Eguna, ?Balea Eguna… Horrelako egiturei, urteko egun jakin batez ari garen heinean, determinatzaile-sintagma dagokie (mugatu egin behar dira, nolabait esateko; alegia, -(r)en atzizkia lotu behar zaie), eta askoz egokiagoa da Sagardoaren Eguna, Bertsoaren Eguna, Berdelaren Eguna, Balearen Eguna eta abar esatea. Ekar dezagun gogora, konparazio baterako, txinatarren egutegiko urteen izendapena: Arratoiaren Urtea (≠ arratoi-urtea [arratoi asko izan den urtea]), Untxiaren Urtea (≠ untxi-urtea), etab.

Eta ospakizun baten izendapena aditzera ematen denez, letra larriz hasita idazten dira hitz guztiak.