Bai, erabil daitezke desberdin eta balio berekoak. Aski da Euskaltzaindiaren Hiztegiko [EH:desberdin] eta [EH:ezberdin] sarreretako adibideei erreparatzea hori egiaztatzeko. Baina egia da berez ez duen esanahi batekin ikusten dugula hainbatetan, kalko desegoki batengatik, eta halakoetan ez dela egoki erabilia euskaraz.

Gaztelaniazko diferentes, diversos, distintos… eta frantsesezko différents, divers, distincts… adjektibo sinonimoek eragiten dute gehienetan gaizki-ulertua. Adjektibo horiek erdarazko esaldian izenaren aurretik ala izenaren atzetik doazen ohartzean dago gakoa. Hiru modu hauetara moldatzen dira, ñabardurak ñabardura:

a) Izenaren aurrean ager litezke artikulurik gabe (Tratarán diversas/distintas… cuestiones // Divers sujets / différentes questions seront traités. Lo han publicado diferentes, diversos… periódicos. Había diferentes opiniones // Différents journaux l'ont publié / Il y avait disverses opinions).

Oro har, horiek dira euskaraz zenbatzaile zehaztugabeen bidez ematekoak (hainbat, zenbait, batzuk, bat(ek) baino gehiago(k)…): Zenbait gaiez mintzatuko dira (*Gai ezberdinez). Egunkari batzuek argitaratu dute hori (*Egunkari ezberdinek). Iritzi bat baino gehiago / zenbait iritzi zeuden (*Iritzi ezberdinak).

b) Izenaren aurrean ager litezke artikuluarekin (Los diversos partidos han coincidido en esa cuestión. Se han instalado persianas venecianas en las diferentes aulas. Se han tenido en cuenta las diferentes, diversas opiniones / Les différents partis se sont mis d'accord sur cette question / Des stores vénitiens ont été installés dans les différentes salles de classe / Les diverses opinions ont été pris en compte).

Horrelakoak denak edo guztiak zenbatzaile orokorrekin (edo plural soila erabiliz) moldatzen dira euskaraz: Alderdi guztiak (Alderdiak) bat etorri dira auzi horretan. Pertsiana veneziarrak gela guztietan (geletan). Iritzi denak hartu dira kontuan.

c) Izenaren atzetik ager litezke adjektiboak (Son cuestiones diferentes, distintas. Tenemos sentimientos distintos, diferentes. Había opiniones diferentes / Ce sont des questions différentes. Nous avons des sentiments différents. Il y avait des opinions différentes.).

Horietan, diferente hitzak adjektibo-balioa du euskaraz ere, Euskaltzaindiaren Hiztegiko adibideetan ematen zaiona, hain justu ere (hartara, bestelako sinonimoa du eta berdin, antonimoa): Bestelako kontuak / Kontu desberdinak dira horiek. Sentimendu desberdinak dauzkagu. Iritzi desberdinak zeuden.