40. arauaren testuan aipatzen diren adibideek nahasmena sortu dute, antza denez; izan ere, bat daramaten adibideak badaudela adierazi nahi izan da, baina inola ere ez forma horiek gomendatu. Bihurtu aditzaren predikatu-osagarria mugaturik ere erabili izan dela erakusteko zen, batik bat, adibide-sorta hori.

[EH:bihurtu] hiztegiak ondo mugatu du auzia: “Predikatu-osagarria, izen hutsa denean, artikulurik eta kasu-markarik gabe doa (Ura ardo bihurtu zen). Izen horrek izenondoak, izenlagunak edo kidekoak hartzen baditu, orduan artikulua darama askotan (Emakumerik ederrena bihurtu zen)”.

Ikus hau ere: "Aditzaren jokabidea: bihurtu (emakume eder bihurtu / emakume ederra bihurtu)" (JAGONET).