Hau dio 34. arauak bukaerako pasartean: “Zenbaitetan -ko/-tako bikoteaz baliatzea ezinbestekoa izan dezakegu bereizketak egiteko: zazpi urteko ardoa (botilan dagoen ardoak zazpi urte ditu), zazpi urtetako ardoa (ardoa zazpi urtetan, ez zortzitan bildua izan da) eta zazpi urteetako ardoa (aldez aurretik ezagutzen ditugun zazpi urte diferenteetan zehar bilduriko ardoa)”. Alegia: Hiru urtean lan egin du zuzena da (hiru urtean = hasieratik bukaerara hiru urte igaro dira jarraian; adibidez, 2016tik 2019ra), eta, hortik, hiru urteko lana. Hiru zenbatzaile zehaztuaren ordez asko zenbatzaile zehaztugabea jarriz gero, berdin: urte askoan lan egin du, eta, hortik, urte askoko lana. Horrelakoak ohikoak dira tradizioan (‘aldia’ adierazten da horietan).

Bestalde, hiru urtetan lan egin du ere zuzena da (hiru urtetan = halako urtean, halako urtean eta halako urtean; adibidez, 2014an, 2016an eta 2018an), eta, hortik, hiru urtetako lana. Zenbatzaile zehaztuaren ordez zenbatzaile zehaztugabea jarriz gero: urte askotan lan egin du, eta, hortik, urte askotako lana (‘kopurua’ adierazten da horietan).

Horrenbestez, eta galderako adibideari gagozkiola, bi moldeak dira zuzenak, urte askoko lana eta urte askotako lana, esanahia zein den. Eta azken 20 urteetakoa/urteotakoa ere (mugatu pluralean, badakigulako zein diren urte horiek) zuzena da.

Ikus hau ere: "Denbora adieraztea: urte (hiru urtean / hiru urtetan / hiru urteetan)" (JAGONET).