Jagonet

Onargarria da 2. adibide hori:

Atzo esan zuen loteria tokatuko balitzait (balitzaio) auto bat erosiko nukeela (zukeela)

Horrekin batera beste hau ere onar daiteke:

Atzo esan nuen (zuen) loteria tokatuko balitzait (balitzaio) auto bat erosiko nuela (zuela)

Gainerako perpaus bakoitzari iruzkin, ohar edo zuzenketaren bat egitea komeni da:

3.1. Perpaus horren azpian bi egitura egon daitezke:

tokatzen bazait, ... erosiko dut

tokatuko balitzait, … erosiko nuke

Edozein kasutan ere, ekintza burutua izan daiteke, baina ez nahitaez; burutua dela dakigun ekintza bakarra esan aditzak adierazten duena da. Parentesi artean ematen den azalpenak gehiegizkoa dirudi: "ekintza burutua da" (edo ez) eta "jakintzat ematen dut ez zaidala tokatu" (edo ez).

3.2. Bi egitura dira hor ere posible:

tokatu izan balitzait (balitzaio), auto bat erosiko nukeela (zukeela)

tokatu izan balitzait (balitzaio), auto bat erosiko nuela (zuela)

Kasu honetan garbi dago esan zuena esan zuenerako ez zitzaiola loteria tokatu.

3.3. Adibidearen bi aukerak hasieran eman dira.

3.4. Adibidean ere bi egitura onar litezke (denbora-komunztadurarekin bata, eta komunztadurarik gabe bestea):

tokatzen bazait, auto bat erosiko dudala.

tokatzen bazait, auto bat erosiko nuela.

Har dezagun argi gehiago ekar diezagukeen beste adibide bat:

Javier Iruretak honako hau esan zuen partida aurretik:

a. Irabazten badugu, Europara joango gara.

b. Irabaziko bagenu, Europara joango ginateke.

Iraganeko zehar-estiloan jartzeko –(e)la sartu besterik ez dugu:

a'. Iruretak esan zuen partida irabazten bazuten Europara joango zirela.

b'. Iruretak esan zuen partida irabaziko balute Europara joango liratekeela.

Edozein kasutan ere, ez dago partidan zer gertatu den jakiteko modurik, zehar-estiloan jasotzen ari garena partidaren aurretik esandakoa soilik baita (desberdintasuna da oraingo honetan iraganean ematen dugula).

Azkenik, gogorarazi behar da beti ez dagoela gaztelania-euskara (edo frantsesa-euskara) baliokidetzarik egiterik; ez dagoela erdarazko baldintzaren eta adizkeraren baliokidetza sistematikorik egiterik kasu honetan euskaraz; euskarak bere sistema du, eta erdarazkoek berena, eta, zorionez edo zoritxarrez, batzuetan desberdin egituratzen du hizkuntza bakoitzak berea. Hori dela eta, ez dago itzulpengintzarako doktrina jakinik ematerik (gaztelaniazko/frantsesezko X egitura hau euskarazko Y egitura honi dagokio, eta Z egitura hau euskarazko beste bati) kasu askotan.

Ikus hauek ere: "Baldintza adieraztea: komunztadura (dituzun aukerak izan bagenitu, ondo biziko ginateke orain)" (JAGONET), "Baldintza adieraztea: estudiatu izan bazenu / hobeto biziko zinen/zinatekeen" (JAGONET).