Jagonet
JAGONET galde-erantzunak
Aditzaren jokabidea: ba- (badatorrela esan du / boligraforik badaukazun galdetu dizu)
Noiz ez da erabili behar aditz-multzoko ba- osagaia? Adibidez, EGA azterketa prestatzeko ateratako liburu batean esaten da ba- ez dela erabili behar mendeko esaldi zenbaitetan, hala nola erlatibozkoetan edo moduzkoetan. Beraz, okerrak dira badiozun guztia, badakizun bezala eta gisakoak. Horiek txarto daude, zalantzarik gabe. Baina konpletiboetan edo zehar-galderetan erabil daiteke? Adibidez, zuzenak al dira ondorengo bi esaldi hauek?:
- Badator. Badatorrela esan du.
- Badaukazu boligraforik? Boligraforik badaukazun galdetu dizu.
Tradizioak dio ba- erabil daitekeela mendeko perpausetako adizki trinkoetan; baita zehar-galderetakoetan ere. Erlatiboena da salbuespena, horietan ez baita erabiltzen. Hori ageri da Euskal Gramatika. Lehen Urratsak V eta Euskal Gramatika. Lehen Urratsak VI liburukietako argibide eta adibideetan.
Beraz:
Badatorrela esan du perpausa zuzena da, perpaus konpletiboetan ba- erabil daiteke-eta, baldin eta mendeko perpausean aditzaren baiezkotasuna bada galdegaia.
Boligraforik badaukazun galdetu dizu perpausa ere zuzena da Euskal Gramatika. Lehen Urratsak V, 109. or., besteko Boligraforik daukazun galdetu dizu ere zuzena den bezalaxe.
Esandakoaren harira, bestetik, zera esan behar da galderako lehen paragrafoko adibideei buruz:
Badakizun bezala konparaziozkoa ere zuzena izan litekeela: Badakizun bezala, etzi oporrak hartuko ditut.
*Badiozun guztia, aldiz, okerra dela; izan ere, erlatiboa da eta horietan ez da ba- menderagailurik erabiltzen Euskal Gramatika. Lehen Urratsak V, 202. or., nahiz salbuespenak ere badauden Euskal Gramatika. Lehen Urratsak V, 217. or..
Informazio gehigarria:
- "ba-" (EBE)
Zalantza-mota: sintaxia > aditza
Unitate-mota: afixuak > aurrizkiak, hitzak-aditzak > adizki ez-jokatuak
Orrialde honetako dokumentu, zerrenda eta datu-baseak Creative Commons Aitortu-EzKomertziala-PartekatuBerdin baimen baten mende daude.
Egoitza
- B
- BIZKAIA
- Plaza Barria, 15.
48005 BILBO - +34 944 15 81 55
- info@euskaltzaindia.eus
Ikerketa Zentroa
- V
- LUIS VILLASANTE
- Tolare baserria. Almortza bidea, 6.
20018 DONOSTIA - +34 943 42 80 50
- donostiaordez@euskaltzaindia.eus
Ordezkaritzak
- A
- ARABA
- Gaztelako atea, 54
01007 GASTEIZ - +34 945 23 36 48
- gasteizordez@euskaltzaindia.eus
- G
- GIPUZKOA
- Tolare baserria. Almortza bidea, 6
20018 DONOSTIA - +34 943 42 80 50
- donostiaordez@euskaltzaindia.eus
- N
- NAFARROA
- Oliveto Kondea, 2, 2. solairua
31002 IRUÑEA - +34 948 22 34 71
- nafarroaordez@euskaltzaindia.eus
Elkartea
- I
- IPAR EUSKAL HERRIA
- Gaztelu Berria. 15, Paul Bert plaza.
64100 BAIONA - +33 (0)559 25 64 26
- +33 (0)559 59 45 59
- baionaordez@euskaltzaindia.eus
