Leku-izenak

(...)
Sotarrana edo Usatarraña lehenengoz 1770ean aurkitu dugu, berandu beraz, eta beste zerbaiten desitxuratzea delako susmoa dugu. Gaurregun ezezaguna da, eta daitekeena da izen "berri" batek ordezkatua izatea, sarritan agitu ohi denez. Badakigu Kaseda eta Galipentzuren arteko mugan zegoela, eta beraz erreka Kasedan sortzen zela. Hau kontutan hartuta, dauzkagun hautagaiak franko murrizten dira, aukera Barranco del Palomar, Barranco de Antón, eta Barranco de Valdarras-en artean egin behar dugularik. Hiru hauetatik Valdarras alde bat utzi behar da, 1696rako dokumentatzen delako, eta beraz Barranco del Palomar eta Barranco de Antón-en artean hautatu beharko dugu. Puntu honetan gogoratu behar da Galipentzun Barranco del Palomar-en kidea den Usadorrezarra kokatu gabea daukagula, eta Val de Ussatarraña (1770) *Val de Usadorrezarrarana-ren, edo hobeki *Val de Usatorrezarrarana-ren desitxuraketa izan daitekeela, erdarazko val eta euskarazko harana-ren bidez kontzeptu bera errepikatzen delarik. Usatarraña edo Sotarrana-k -t- bat eskatzen dute jatorrizko hitzean, eta Usadorrezarra-n honelakorik ez badago ere, euskara galtzearekin edo ahultzearekin erdal izenak euskalduna ordezkatu zuela suposa dezakegu, gurutze / kurutze, kruze, cruz-ekin gertatzen den modu berean (ikus adibidez, Uxueko Gurutzegibela sarreran dioguna).
(...)