Leku-izenak

(...)
1594ean aurkitu dugu lehen aldiz. 1722an "basílica" izenpean azaltzen da. Cantera de la Magdalena 1659an ediren dugu aurrenekoz eta gaur ere erabiltzen da, ermita dagoen gaina aditzera emateko. Dokumentazioko Costalada de la Magdalena edo egungo Costalado edo Cuesta de la Magdalena beste batzutako Ladera de la Magdalena-ren eta euskarazko Madalenasaietsa-ren [Ikus saihetsa-z Dermio baten zatiketa atalean dioguna.] adierakidea da, eta ermita dagoen mendiaren herri aldeko mazela adierazten du. Debajo de la Magdalena-k ere antzeko zerbait adierazi behar zuen, eta Junto a la Magdalena ermitaren ondoko eremua zen. Detrás de la Magdalena edo Tras (de) la Magdalena-k ermitaren atzeko aldea ematen du ezagutzera, hau da, Oibarko muga aldea. Barranco de Detrás de la Magdalena Fuente del Boj-etik jaisten den erreka dugu, beheitiago Barranco de Olibeta izena hartzen duen berbera. Paso de la Magdalena edo Paso debajo de la Magdalena Camino de Balatua eta Río Oscuro-ren elkargunekoa da (cf. Senda del Paso). Oibarko mugaren ondoan bada beste Paso de la Magdalena bat, Barranco de Olibeta-ren goiko aldean. Portillo de la Magdalena, azkenik, ermitatik hurbil dagoen dagoen harrarte modukoa da.
(...)

(...)
Olibo 'olibondo' izena eta -eta atzizkia ditugu toponimo honetan. O + e > e pausorako cf. Agezako Erresoreta (< errege + soro + eta) edo Oibarko Soreta ( < soro + eta). Oliboak ugariak ziren eta dira gure alderdian, eta hau dela kausa Olibeta toponimoa ere arrunta da (guk Ageza, Eslaba, Galipentzu eta Morionesen aurkitu dugu). Uxuen La Oliveta dugu, baina hau La Oliva monastegi-izenaren txikigarria da. Olibeta [òlibéta]-k Oibarrekin, El Rebote, La Mazuela eta La Muga-rekin mugatzen du. Barranco de Olibeta La Sierra eta Gabaran aldetik heldu dena da, hots, gorago Barranco de Detrás de la Magdalena eta beherago Barranco de Nobeletaondoa deitu ohi den erreka. Pozo de Olibeta errekan dago, Puente de las Viñas eta Oibarko errepidetik hurbil. Dokumentazioko 1723ko Las Olibetas eta 1783ko Olibetas funtsik gabeko aldakiak dira, egungo izenak salatzen duenez, eta notarien gogo erdalduntzaileari leporatu beharko dizkiogu.
(...)