Leku-izenak

(...)
Las Cuatro Mugas Leatxe, Oibar, Irunberri-Olatz eta Izkoren arteko mugak bat datozen eremua da, Berdeaga, Elordia eta Alto de Izco-ren artekoa. Leku-izen hau Irunberri-Olatz [Id., 25. k. 1648.], Oibar [Id., 68. k., 1770. Bizirik dago oraindik.] eta Tafallan [J. Jurío, THET, 94. or.] ere ageri da. Zenbatzailea eta muga izenaz osaturikako toponimoak ugariak dira han-hemenka, erdaraz nahiz euskaraz, hiru edo lau muga elkartzen diren gunea izendatzeko. Gure eskualdean eta inguruetan, aipatutakoez lekora, hauek ditugu: Las Tres Mugas Kaseda [PRA-Kaseda, 51. k., 1830.], Oleta [PRA-Oibar, 25. k., 1646. Honen ordain euskalduna den Irurmugeta (-r- eta guzti) ere aurkitu dugu (PRA-Barasoain, 3. k-bis, 1609). Zenbatzailearen dardarkariaren presentzia ulertzen erraza da, Juan de Beriaynek ("yrurgarren gauza, cerengatic egon bearbaytugu atenciorequi, eta deuociorequi..." TCOM, 30. or.); eta Lizarraga Elkanokoak ("Irur lagún bearrtu, errán becala...", UIGPL, 34. or.) ere irur erabiltzen dutela (ez beti, alabaina) aintzat hartzen bada. Artaxonako toponimian ere irur- dugu Iruridoia, Iruridoita toponimoetan (Lacarra, VM, 46. or.).], eta Uxuen, eta Tres Mojones Lergan [Arakil-Ekain ere Tres mugas dugu, Iltzarbe, Ekai eta Urritzolako lurrak bat datozen alderdian. Arbizun berriz aipatu Oletako Irurmugeta horren kidea den Irumugeta daukagu].
(...)