Leku-izenak

(...)
Osagai gardenak ditu egun Zubaldea [zùbaldéa] ebakitzen den honek. Alabaina, agirietako Zubialdea-k bi toki ezberdin izendatzen zituela dirudi (argitasuna ez da erabatekoa, halere); gaurko Zubaldea lehenik. Eta Barranco de Errotaxar eta Barranco de Presaldea (Barranco de Ezpondabe, Barranco del Soto) elkartzen diren gunekoa bigarrenik, beste gisaz Puente de los Linares deitzen zena. Hau berau izan zitekeen 1658an ageri dena. Bi zubi hauetaz landara Eslaban egungo Barranco del Puente viejo-n bada beste zubi bat (El Puente viejo), Zangozabidea-n, eta ondoan, orain Barranco de Siringua deritzanean, Xubingoa edo zubi txikia genuen (ikus sarrera hau). Udalerriko beste zubia errepideko Puente de los Pozos dugu (ikus Pozos sarrera). Bizirik dagoen Zubialdea Barranco de Zubialdea (Barranco de Lergabidea beherago)-ren bi aldeetan hedatzen da, Los Linares partean batez ere, eta Arangaitz, Artatzea, Santa Ana, El Corral redondo, Lergabidea eta Iguzkun-ekin mugatzen du, aipatu Los Linares (Jaun Done Eztebe antzina)-ekin ezeze. Baina dirudienez beheko Zubialdea aldeari ere Barranco de Zubialdea esaten zitzaion, bikoiztasun hau espejismo hutsa ez bada bederen. 1834eko lekuko baten arabera Zubialdea Lergako errepideraino iristen zen. Egun Lergabidea-raino ailegatzen ez denez, Agezakoek Lergara joateko ibiltzen zuten Camino de Zubialdea-rekin identifikatu beharko dugu aipatutako hori. Fuente de Zubialdea alderdiko errekan dauden bi edo hiru iturri txikietako edozeini esaten zaio orain, eta Paso de Zubialdea Camino de Zubialdea-k eta Barranco de Zubialdea-k elkar gurutzatzen duten gunean dagoen pausua da.
(...)