Leku-izenak

(...)
Beste gisaz La Virgen deitzen zen ermita eta ermitaren ingurukoak adierazten dituzte izen hauek (orain ere La Virgen deritza alderdi honi, baina ez dago ermitarik bertan). Pérez Ollok dioenez [EN, 89. or.] 1802an eslabarrek, Igual de Soria apezpiku bisitatzailearen aginduei entzungor eginik, hondatzen hasia zen ermita hau osotara desegin zuten, berriztatu beharrez. Nuestra Señora euntze baten ondoan zegoen, eta hortik del prado deizioa. Aurreko lekuko Yglesia hori bertako ermita zen [Orain, esan bezala, ez dago ermitarik bertan. Jendeak, alabaina, badaki antzina bat izan zela.]. Badakigu, halaber, erromerian joaten zela bertara. Ermitaren ondotik igarotzen zen orain ezezaguna den Camino de Pamplona. Ermitaren ondoan edo inguruetan Zaldua edo Monte de Zaldua zegoen, itxuraz. Antzina La Virgen Arangaitz-en barrukotzat jotzen zela dirudi, orain aparteko dermioak diren arren.
(...)

(...)
Pérez Ollok [EN.] dioenez 1802an Igual de Soria apezpiku bisitatzaileak ordurako hondatuxe zegoen ermita berriztatzeko agindua eman zuen, baina eslabarrek kasurik egin ez, eta zeharo eraitsi zuten (ikus Nuestra Señora sarrera). Gaurko La Virgen izen bereko errekaren alboan dago (Barranco de Elkea deitua gorago), Arangaitz, Amikarren (?) eta Larrasoil-eko mugan. La Virgen izena 1779an aurkitu dugu lehendabizikoz, eta errekaren aipamena 1781ean egiten da estraineko aldiz. Costera de la Virgen El Pinar de los Cerros baino pixka bat beherago dago, eta El Hoyo de la Virgen-ek errekaren bi aldeak hartzen ditu, harana, alegia. La Fuente de la Virgen azkenik Barranco de la Virgen-en dago, eta esan bezala erreten baten bidez (dokumentazioan Acequia de los Linares izenpean ageri denaren bidez) herrian bertan dagoen Txirria-ra eramaten zen ura. Orain hodi baten bitartez eramaten da ura herrira, beharra dagoenean.
(...)