Leku-izenak

(...)
Los Fayales [fayáles] Eslabako udalerriaren goiko puntan dago, Julio, Oleta eta Lergako mugan. Lehen hondar herri honekiko fazeria genuen Los Fayales (ikus aurreko sarrera eta Lergako Facería de Fayales sarrera). Iturria Julioko mugan dago, lehenik herrixka honetara eta gero Artetara sartzen den errekan. Iturria hartua dago, eta bere ura beharra dagoenean herrira ekartzen da. Bestela Elkea-n egin berri den idoia hornitzeko erabiltzen da. Los Fayales-ek Lerga (ikus herri honetako Facería de Lerga y Eslava sarrera), Oleta eta Julioko lurrekin mugatzen du, bai eta Eslabako bereko Erbiñaga eta Larrasoil-ekin. Mende honen hasieran partzelak zeuden bertan (cf. Camino de las Parcelas), baina hirurogei bat urte duela lerrak landatu ziren eta orain pinudia dago. Gaurregun pago bat edo beste egon daitekeen arren, haritzak ugariagoak izan dira orain lerra nagusi den eremu honetan, gure informatzaileen arabera. Eslabatik Iruñerako bidea Bizkaiko Sabaitza herriko El Fayal deitu mendian zehar zihoan, eta eskualde honetan antzina pagoak ugariak zirela irudi du (cf., gainera, Leatxeko El Hoyo del Fayal). Sabaitzako lurretan oraindik ere ba omen dira pagoak.
(...)