(...)
Artatzabarri eta Larrauri // Auzoa: Artatza // Artatza auzoan dagoen baserri hau bertakoek Larrauri izenarekin ezagutzen dute, eta hala dio etxaurrean duen plaka batek. Gainera, plakan bertan, 1921ean eraikia izan zela dio. Hala ere, aztertutako dokumentuek pentsarazten dute inguru horretan bazegoela Artatzabarri izeneko beste baserri zaharrago bat, 1865etik Artaza-nueva bezalako aldaerak dokumentatzen baitira. // Bestalde, inguru horretan bertan bada baserri berriago bat jabeek Artatzabarri deitu dutena. Etxalde hau XX. mende erdialdekoa omen da eta bertako jabeak kontatzen duenaren arabera, 1921ean Larrauri eraiki zenean, inguru horretan hiru baserri baino ez zeuden: gaur egun oraindik zutik dirauen Otsotena, Gerra Zibilean bonbardatu zen Arbiaska eta Pinosoloko parkean zegoen beste baserri bat. Pinosoloko parkean zegoen baserri hura (bat baino gehiago izan zitekeen) dagoeneko desagertu da, baserri handia zen eta bost edo sei familia bizi ziren bertan. Garai haietan Aznar familiak Pinosoloko baserri eta lurrak erosi zituen eta bertan bizi ziren familiak banatu behar izan zuten, familia haietako batek Larrauri eraiki omen zuen. Aznar familiak txabarritarren jauregia berdindu nahi zuen, baina lanak bertan behera geratu ziren eta gaur egun Pinosolo bezala ezagutzen den baserria berreraiki omen zuten euren aisirako
(...)