Datorren ostegunean, uztailaren 3an, Euskaltzaindiak atal berri bat zabalduko du bere webgunean: “Hitz-elkarketa”. Bertan jaso dira LEF batzordeak (Lexiko Erizpideak Finkatzeko batzordeak) hitz-elkarketaz egin dituen lau lanak. Horietako hiru paperean baino ez zeuden eskuragarri, eta laugarrena argitaragabea zen. Aurkezpena goizeko 11:00etan izango da, Donostian, Luis Villasante Euskararen Ikergunean.
Horietako hiru -Hitz-Elkarketa/1 (1987), Hitz-Elkarketa/3 (1991) eta Hitz-Elkarketa/4 (1992)- eskura zituen erabiltzaileak paperezko edizioan, baina ez zegoen bertsio elektronikorik. Orain PDF formatuan ere kontsulta daitezke, webgunean.
Laugarren lana, Hitz-Elkarketa 2 izenekoa, argitaratu gabe zegoen orain arte. Horren edukia, beraz, lehenbiziko aldiz eskaintzen da, hiru bertsiotan: modu interaktiboan, ordenagailuan nabigatzeko; PDF formatuan; eta ePub bertsioan, irakurgailu elektronikoetara jaitsi eta bertatik nabigatzeko. Lana Miren Azkarate euskaltzain osoak eta Elixabete Perez Gaztelu euskaltzain urgazleak prestatu dute.
1986ko udaberrian LEF Batzordea sortu zuen Euskaltzaindiak, garai hartan euskaltzain urgazle zen Mikel Zalbideren proposamenez. Gaur egun Zalbide euskaltzain osoa da. Hitz-Elkarketa 2 liburuaren sarreran azaltzen denez, “batzorde honek hitz-elkarketa aztertzeari ekin zion eta, lehenik, Zalbidek berak eginiko euskal hitz elkartuen behin-behineko sailkapen orokorra onartu zuen. Sailkapen hori begien aurrean izanik hasi zen batzordea lanean, eta handik urtebetera argitaratu zen lehen emaitza, Hitz-Elkarketa/1 liburukia”. Beste bi liburuak etorri ziren gero, eta Hitz-Elkarketa 2 argitara eman gabe geratu zen, hasieran aurreikusi baino askoz lan handiagoa eskatzen zuelako.
Aurkezpena honako hauek egingo dute: Andres Urrutia euskaltzainburuak; Miren Azkaratek eta Elixabete Perez Gazteluk; eta Jon Artza Euskaltzaindiko Argitalpen zerbitzuko arduradunak.