(...)
Etxebarriko lehenengo eskola San Esteban eliza zaharraren aurrez aurre egon zen, Kukullaga auzoko Eleizondo izeneko baserrian. Eraikina udalaren jabetzakoa izan zen eta eskola izateaz gainera, ospitalea ere izan zen. Handik Etxepinto baserri ingurura eroan zuten eta, dirudienez, tarte laburrean izan bazen ere, Etxepinto baserrian ere eskolak eman ziren. Leku egokiagoaren beharrean, belu barik, XIX. gizaldi amaieran, maisu nahiz abadearentzako logela, udaletxe, eskola, taberna, alondegia eta kartzela izango zen etxea eraiki zuten Santa Ana plazan eta bertan egin zituzten Etxebarriko umetxo gehienek euren lehenengo ikasketak. Beste batzuk Tere Iturriaga andreak Estanko edo Iturriagaena etxean zabaldu zuen Santa Ana eskolan egin zituzten. Garai berean, beraz, ia parez pare, berrehun metrora-edo, eskola bi egon ziren Etxebarrin, bata udaletxean eta beste Tere Iturriaga andereñoaren etxean. Kukullaga auzoko eskola, berriz, 1960ko uztailaren 17an inauguratu zen.
(...)