Leku-izenak

(...)
[Dermio baten zatiketa. -Ondoa] Posposizio honen formari dagokionez, oinarria bokalez bukatzen denean bokal laburketa gauzatzen da batzutan, baina beste batzutan ez, eta ez dirudi horrelako lege finkorik dagoenik. Agian lehen lekukoek (XVI-XVII. Mendekoek) bokalak dauden-daudenean gordetzeko joera erakusten dutela esan liteke, geroagoko lekukotasunek maiz forma laburtuak dituzten bitartean. Adieraz den bezainbatean, oinarrian azaltzen den eremuaren aldameneko alderdia ematen duela ezagutzera esan daiteke, baina guretzat behintzat ez dago garbi aldamenekotasun hori zertan datzan, ez eta aldea posposizioa duten toponimoetatik zertan bereizten den, aldea badela garbi dagoenagatik. Eslaban, esaterako, gauza bat zen Artaduondoa eta beste bat Artadualdea, eta Nafarroako beste herri batzuetan [Gehienetan seguruenik, baina gu ezagutzen ditugun datuetatik mintzo gara, gisa denez.] ere gisa bereko bereizketak aurkitu ditugu. Aezkoa-Hiriberrin, adibidez, Beragua dermioa dugu, eta honen barruan Beraguarria eta Beraguarana azpidermioak, gutieneko kontuan. Beraguarria-ren barrenean, alderdi ezberdinal adierazten dituzten Beraguarraldea eta Beraguarrondoa ditugu, baina zoritxarrez ez dakigu bion arteko aldea zertan dagoen.
(...)