Leku-izenak

(...)
Loya Moriones, Irangote, Arteta eta Eslabaren arteko herrixka orain despoblatua da, eta Río de Loya hortik heldu den ubidea (Loiaerregua edo Loiaerreka). Dokumentazioko Cabezo del Carasol de Loya oraingo Alto de Jaugia eta lehengo Jaugiburua bera da.
(...)

(...)
Gaurko zenbait tokitako ebakeran oinarrituz jauregia-ren laburketa baten aurrean gaudela kontu egin liteke, baina ibar bereko Lergan Jaureguicar aurkitzen dugunez gero, badirudi Jaugia-ren azalpena beste nonbaitetik bideratu beharra dagoela. Gainera Jaugia (Auria [auría] gaur) herritik aparte dago, Loia eta Irangoteko mugan, La Caseta eta El Corral de la Muga-en artean [Dena den, Euskal Herriko beste toki batzutan Jauri Jauregi-ren laburketa "herrikoia" da (cf. Eleizalde, LVTV).], eta hortaz ez dirudi ustezko *Jauregia-tik erator daitekeenik (cf., alabaina, Agezako Palacio). Gure eritziz toponimian ugariak diren partizipioetako batez pentsatu behar da kasu honetan: cf. Uxue aldean horren arrunta den Sarria, edo Nafarroako herri eta leku-izenetan ditugun Errea (Esteribarren. Cf. Iruñe ondoko Burlata), Igoa (Basaburua)... eta beste. Jaugia ja(u)lki, jalgi 'atera' aditzarekin lot liteke, adiera honekin, guk dakigula, *jaugi-ren modukorik dokumentatu ez bada ere. Alabaina, proposatu etimologiarekin bat dator Morionesko Jaugia (cf. Oraingo Alto de Auria eta dokumentazioko Jaugiburua) eta Eslabako Xaugizabal (ikus sarrera hau) mendiak izatea ('atereak' alegia). Dokumentazioan j-z nahiz y-z idatzirik aurkitu dugu, eta beraz bi grafia horien azpian [y] genuela ondorioztatu beharko dugu, ez Eslabako [sh]. Egungo forma lehenengoz iragan mendeko erdi aldean ediren dugu.
(...)

(...)
Gaur Alto de Auria deitzen dena da, alegia, Irangote eta Loiako mugako gaina. Hemen berriz ere erdal alto eta euskal -buru-ren arteko baliokidetasuna daukagu.
(...)