Leku-izenak

(...)
Egungo Cerro Mandurro [zérromandúrro] izena ez da dokumentazioan agertzen, eta gure informatzaileetako batek idarokitzen duenez Agezako norbaiten sasizena izan zitekeen. Alabaina, gain baten izena denez, baliteke euskarazko mendi-rekin zerikusia izatea, baina honela ez balitz ere, bere euskal etorkia segurua dela uste dugu, agirietan azaldu ez arren (cf. Uxueko Makarreta): Orbako Leotzen Mendiurrun dokumentatzen da 1629an eta 1634ean [PRA-Barasoain, 5. k. eta PRA-Oibar, 23. k.], Orotz-Betelun Mendiurru, Menyurru edo Mendiurrun dugu [B. Urtasun, TOB, 339. eta 345. orr.], Eguaratsen Menduro [F. de Leizaola, "Toponimia del Valle de Atez", AIO, 409-421. orr.], Beuntzan Mendúrre, Imotzen 921 metroko gaina den Mendurro [mendúrro] daukagu Muzkitzen, Mendarro [mendárro] Latasan, eta Mundarro [mundárro] Goldaratzen, azken biak gain bera izenda dezaketelarik, herriak mugakideak direnez. Goldarazko toponimoa Mendarrua edo Mendarrogoiti zen 1800ean [Indice de Gravámenes, Goldaratz. Ollakarizketan Garcia Mendiurrucoa dugu XIII. mendean. TAV, 35. or.], Mendarro ("cerro comun" zela dio agiriak) 1826an [Id.], eta Mandarro 1829an [Id.]. Cerro Mandurro Ategarate-ren barruko gaina da, Portillo de Gezari-ren aldamenekoa, eta badaiteke lehengo Bizkarraranportillua toponimoan ageri den bizkar hori bera izatea.
(...)