Leku-izenak

(...)
Gainera, gerta daiteke hizkuntza ofizial bietan izenak nabarmen desberdinak izatea eta horrelakoetan biak normalizatu eta ofizialduko dira. Hala gertatzen da Opellora / Costera, Elexalde / La Iglesia... eta era horretakoetan. Irizpide hori ematen da aditzera Euskararen Erabilpena Arautzeko Oinarrizko Legean ere, haren 10. artikuluak Legebiltzarreko saiora joan ziren alderdi politiko guztien aldeko botoa izan zuelarik [2 Azaroaren 24ko 10/1982 Legeko 10. artikuluan honako hau ezarri zen: // «1. Autonomia Elkarteko lurralde, udal, herri, geografia-gorabehera, hiribide eta, oro har, toki-izen guztien izen ofizialak Jaurlaritzak, Kondaira-Lurraldeetako Foru-Erakundeek edo Toki-Erakundeek finkatuko dituzte, bakoitzak berari dagokion aginte-eremuaren barruan eta, beti ere, jatorrizko izen euskaldun, erromantzezko edo gaztelaniazkoari, hizkuntza bakoitzari dagokion idazkeraz men eginez. // Toki-erakundeen eta Eusko Jaurlaritzaren artean aurreko atalean esandako izen ofizialei buruzko auziren bat gertatuz gero, Eusko Jaurlaritzak ebatziko du, aurrez Euskaltzaindiari bere iritzia eskatu ondoren. […] 3. Izen hauek oso ezberdinak izanez gero, bide-seinaleei buruzkoetarako, biak ofizialtzat joko dira»]. Irizpide honen aldekoa da Euskaltzaindiko Onomastika batzordea ere, eta aipaturiko Legean eta Autonomi Estatuan jasotakoari jarraiki, Euskaltzaindia da gai honetan erakunde aholkulari ofiziala [3 Autonomi Estatutuko 6.4 artikuluan honako hau esaten da hitzez-hitz: «Euskarari dagozkionetan, Euskaltzaindia izango da erakunde aholku-emale»]. Dena dela, Lege horretan ez da zehazten «oso ezberdinak» izate hori zertan datzan, nahiz eta zentzuzkoak izanik, bertakoek hala hartzen badituzte edo forma bat eta bestea elkar trukatzeko zailak baldin badira, «oso ezberdintzat» jo behar direla dirudien. Argi dago, beraz, Aretxazar, Etxabarri edo Campijo bezalako izenek ezin dituztela onartu baliokidetzat, ez idatziz ez eta era ofizialetan ere, Arechazar, Echabarri edo Kanpijo idazkerak [...] Zoritxarrez, toki askotako euskal izenak azkenengo euskal hiztunekin batera galdu ziren eta gaur egun ez daukagu izen horiek jakiteko modurik. Baina zenbaitetan, horietako batzuk berreraikitzeko aukera izaten da. Euskal Herriko mendebaldean eliza dagoen auzoa izendatzeko Elexalde erabiltzen zela argitzen duten adibide asko ditugu. Hala gertatzen da Barrundian hasi eta Amurrio nahiz Beotegiraino, herri horretan oraindik ere XIX. mendean Elejalde forma dokumentatzen baita, hau da, euskal izenaren forma gaztelaniartua. Hori dela eta, egungo Barrio de la Iglesia eta antzekoak euskarazko Elexalderen itzulpen hutsak direla esan genezake eta, horrenbestez, bidezkoa dateke atzera bihurtzea [...] Kontzejuko eta udalerriko auzoburua / Capitalidad del concejo y del municipio: ED50 30T X.496644, Y.4769669, alt. 315 m. // Arespalditza kontzejuko auzoburua da, baita Aiara udalerriarena ere. Izoria eta Itzalde ibai arroak banatzen dituen muinoaren beheko aldean dago, Ungila edo Eskorieta mendiaren ekialdera dagoen malda beherean, zehatzago esanda, Amurrio eta Artziniega lotzen dituen A-624 errepideko 47. puntu kilometrikoa baino apur bat lehenago. Auzoan udaletxea eta Andra Mariaren Jasokundeko parrokia daude. Garai batean herriko jaiak Jasokundean eta San Roke egunean izaten ziren arren (abuztuaren 15 eta 16an), gaur egun San Prudentzio eguneko jai orokorragoa ospatzen da (apirilaren 28an), baita kontzejuari atxikiago dagoen San Isidro ere (maiatzaren 15ean). Hilerria etxeek osatutako gunetik iparraldera dago eta haren barruan Santa Luzia ermita dago. Ermita horretan daude Aiarako antzinako noble batzuen hilobiak, hala nola Atxako markesenak edo Cerrajeriako kondeenak. Auzoko eraikin aipagarrien artean, elizaren hegoaldean, Guzieskora doan bidearen ondoan, Atxa jauregia nabarmendu behar da. // Elexalde euskal forma normalizatzeko aukerari dagokionez, ikusi Añesko kontzejuan izen bereko auzoari buruz esandakoa
(...)