Datuak ikusirik, esan daiteke tradizioan pertsonari aplikatu izan zaiola (‘Gauzak alderik onenetik ikusteko edo hartzeko joera duena’-ri) eskuarki, ez gauzei. Bide horretatik jo du Euskaltzaindiaren Hiztegiak [EH:baikor] definitzean, eta adiera horixe da nagusi Orotariko Euskal Hiztegian ere [OEH:baikor].

Hala ere, Lexikoaren Behatokian begiratuz gero, gaur egun, adiera zabalagoko adibideak ugari ageri dira: alde baikorra, balorazio baikorra, datu baikorra, eboluzio baikorra, errefortzu baikorra, izaera baikorra, jarrera baikorra, mezu baikorra, oihartzun baikorra, ondorio baikorra...