lehenago
1 adb. Aipatzen den unearen edo, eskuarki, mintzatzen den unearen aurreko denboran. Bi urtez lehenago hasia baitzen kantaldiak ematen. Berrogei urte lehenago egindako emanaldia ekarri zuten gogora. Berandu ohartu da, baina ez zitekeen lehenago ohartu. Idatzia begiek jasotzen dute bestek baino lehenago. Lizardi behar baino lehenago galdu genuen. Lehenago eta geroago.
2 adb. (Aditz bati dagokiola, lehentasuna adierazteko). Horrela uste banu, lehenago egingo nioke uko euskaltzaletasunari zentzuari baino. Lehenago hil, bekatura bihurtu baino.
3 adb. Lehen, garai batean. Lehenago Erromako emazteek ez zuten batere ardorik edaten. Gaztelaniazko vi berria vide zen lehenago. Diruak eragin ditu lehenago ere hori baino okerragoak.