(...)
Santo Tomás edo Sanditume ermitako bidearen inguruko auzoa zen. Ermita Lergatik hurbil zegoen, gaurko Santo Tomás alderdian, Coseras eta Los Femorales artean. Barrio de Santo Tomás gaurko "Casa del Zapatero" eta inguruko etxeei deituko zitzaien, oraingo Altico de Santo Tomás etxe horren ondoan baitago.
(...)

(...)
Ikai- Azkuek aipatzen duen ikai 'aldapa' (ika + ai?) [Mitxelenak igan'igo'-rekin lotzen du (FHV, 232. or.). Cf. galdu / kalte, edeki 'kendu / etekin.... Cf., gainera, Oihenarten 164. atsotitza: "Ezt'ikaia non eztuen bere iztaia" 'ez dago gorako aldaparik beherakorik gabe'.] izan daiteke, Ikaiburu gain baten izena delako, -buru euskaldunak eta alto erdaldunak argi erakusten dutenez. Oltza herrian [Jimeno Jurío, TCPCO, 246. or.] Lergako toponimoaren kidea izan daitekeen Içaiburu dugu (ç hori ez da nahitaez z edo tz baten adierazle), eta Altzutzan Kaiburu bildu du Eleizaldek [LVTV.], Lergako toponimoak bezala honek ere lehen bokalaren aferesia jasan duelarik (Kaiburu [ka}i?béuru] esaten da orain Lergan). Autore beronek ikai bide duen Ikaiturri biltzen du Deierriko Lezaun herrian, eta Ikopuru edo Ikapuru Mañarian. Azken honek mendi xut bat izendatzen duela dirudi. Lergan, esan bezala, Cuesta de Ikaiburu errekatik herriraino igotzen den aldapa da, dokumentazioko Aldaiondoa toponimoan aurkitzen dugun aldaia bera (ikus Aldaiondoa sarrera), eta bistan denez honek ere ez dio bat ere kalterik egiten proposatu etimologiari. Uxue eta Pitillasen arteko mugan ikai-ren aldaera bide den ika, pika [Ikus AV, 146. or.] azaltzen zaigu Pikarana toponimoan. Hemen ere aldapa xuta dago, eta harana. Ikaiburu Jaun Done Petri (Juandepetri egun) eta Sanditume edo Santo Tomás-en ondoan dago. Euntzeberri, Los Llanos eta San Pelayo-rekin ere mugatzen du. Barranco de Ikaiburu Barranco de Zamiki eta Barranco de Andua elkartu ondorengo erreka da, eta Barrio de Ikaiburu mintzagai dugun dermiotik hurbileneko auzoa izanen zen, Barrio de Santo Tomás apika.
(...)