(...)
Auzoa / Barrio: ED50 30T X.498798, Y.4769191, alt. 205 m. // La Iglesia auzo nagusiaren ekialdean dagoen auzo txiki bat dugu, Izoria ibaiaren ertzean. Hemendik gertu dagoen Murgako dorreari zor dio izena, oinetxe horrek eman baitzion izena kontzejuari ere, eta ibaiaren eskuinaldean dago. Madozen Diccionario delakoan (1845-1850) identifikaziorik gabeko jauregi bat aipatzen da eta, seguruenik, dorre honetaz ari zen. Auzo honetara joateko, Aretxabaletik Ugartera doan A-3620 errepide ondoan, Aretxazar auzoan eskuinera aurkituko dugun adar bat hartu behar da, Ugarten bertan jadanik, kontzejuko aretoa pasatuta. Auzoko lehen baserritik dorrera joateko, erreka zeharkatzen duen zubi bat igaro behar da. // Auzoari Palacio-Murga esan izan zaio askotan, baina lehen ere esan dugu horrelako izen generikoak sarritan itzuli izan direla administrazioak erabiltzen duen hizkuntza ofizialera, eta halaxe gertatu dela Euskal Herriko hainbat lekutan. Auzoaren gaurko Torre izena, beraz, Murgako torrea adierazpidearen aldaera laburtua baino ez da. Euskarazko dorre aldaera estandar eta torre dialektalari buruz, ikus Luiaondoko Torre izeneko kalean esandakoa
(...)