Denbora adierazten du batez ere -(e)nean menderagailuak. Batzuetan, dena den, esaldi adberbialetan maiz gertatzen den bezala, har ditzake beste balio batzuk ere. Tradizioan eta egungo erabileran badira honelako esaldi egokiak:

Hori egin zenuenean, gauza ona egin zenuen (gertakari baten inplikazioa [= hori eginda]).

Zuk horrela diozunean, horrela izango da (baldintza).

Zerbait jakingo du, halako ziurtasunez mintzatu denean (baldintza-kausa).

Pozik egon daitezke suak dena kiskali ez duenean (kausa).

Honaino iritsi zarenean, aurrera segitzeko gauza izango zara (denbora-kausa).

Beste batzuetan, hala ere, erdarazko —es: ‘cuando’ / fr: ‘quand’, ‘lorsque’— hitzen molde kalkatu(egi)a dagoela dirudi. Esate baterako, ustekabeko zerbait adierazi nahi denean:

?Zubira iristen ari ginen, sute bat ikusi genuenean (> Zubira iristen ari ginen, eta (, bat-batean,) sute bat ikusi genuen. / Zubira iristen ari ginela, (bat-batean,) sute bat ikusi genuen. / Zubira iristen ari ginela, hara non sute bat ikusten dugun) [es: ‘cuando (de pronto)’].

Edo kontzesiozko adierari gain hartzen dionean:

?Myanmarren oraindik bada laguntzarik jaso ez duen lekurik, zikloiaren astindutik bederatzi egun pasa direnean (> Zikloiaren astindutik bederatzi egun pasatu dira, eta Myanmarren oraindik bada laguntzarik jaso ez duen lekurik / bederatzi egun pasatu badira ere...).

Edo moduzko adiera errespetatzen ez duenean:

?Langile bat hil da gaur istripuz. Kiroldegi berria eraikitzeko obran ari zen, 12 metrotik behera erori denean (> Langile bat hil da gaur istripuz. Kiroldegi berria eraikitzeko obran ari zela, 12 metrotik behera erori da).